अभिनेता टायगर श्रॉफ याच्यावरील गोळीबार प्रकरणाच्या तपासात मुंबई गुन्हे शाखेच्या हाती महत्त्वाचे डिजिटल पुरावे लागले आहेत. अटक करण्यात आलेल्या चार आरोपींच्या मोबाईल फोनमधून शस्त्रांची खरेदी, साठवणूक आणि वाहतुकीबाबतची अनेक व्हॉइस नोट्स पोलिसांनी हस्तगत केल्या आहेत. याशिवाय, आरोपी कुणालचा मोबाईल क्रमांक राधाच्या फोनमध्ये ‘जय बलकारी’ या नावाने सेव्ह करण्यात आल्याचे तपासात समोर आले आहे. ओळख लपवण्यासाठी हा प्रकार करण्यात आल्याचा पोलिसांना संशय आहे.
या प्रकरणात राधा सुनील वर्मा (२१), बबिता रामजतन राव (२४), कुणाल संजयकुमार जमिनसिंग (२१) आणि सुमित बिजेंद्र सरोलिया (१९) या चौघांना अटक करण्यात आली आहे. या आरोपींनी गोळीबार करणाऱ्या हल्लेखोरांना शस्त्रे पुरवल्याचा आरोप आहे.
तपासादरम्यान कुणालने राधाला अनेक व्हॉइस नोट्स पाठवल्याचे पोलिसांना आढळले. त्यासोबत पाच काडतुसांची छायाचित्रेही पाठवण्यात आली होती. मात्र, ही छायाचित्रे नंतर डिलीट करण्यात आली. कुणाल आणि राधा यांच्यातील संवाद, छायाचित्रे, व्हिडीओ आणि अन्य डिजिटल माहिती मोबाईलमधून हटवण्यात आल्याचे तपासात समोर आले आहे. काही व्हॉइस नोट्स पोलिसांनी पुन्हा मिळवल्या असून, डिलीट केलेला उर्वरित डेटा पुनर्प्राप्त करण्याचे प्रयत्न सुरू आहेत. हस्तगत केलेल्या ध्वनिमुद्रणांमधील आवाज नेमके कोणाचे आहेत, याचीही पडताळणी केली जाणार आहे.
पोलिसांच्या म्हणण्यानुसार, या व्हॉइस नोट्समध्ये शस्त्रे कुठून आणायची, कुठे ठेवायची आणि कोणाकडे पोहोचवायची, यासंदर्भातील संभाषणे आहेत. शस्त्रांचा वापर कोणत्या गुन्ह्यासाठी होणार आहे, याची आरोपींना माहिती होती का, याचाही तपास केला जात आहे. गोळीबारानंतर पिस्तुले आणि उर्वरित काडतुसे गोळा करण्याच्या सूचना आरोपींना देण्यात आल्याचा दावा पोलिसांनी न्यायालयात केला. आरोपींना अटक झाली नसती, तर ही शस्त्रे आणि न वापरलेली काडतुसे पुन्हा दिल्लीला नेऊन मूळ स्रोतापर्यंत पोहोचवण्याचा तसेच महत्त्वाचे पुरावे नष्ट करण्याचा प्रयत्न झाला असता, असा पोलिसांचा आरोप आहे.
हे ही वाचा:
‘अर्णब’ चक्रीवादळाचा आंध्र प्रदेश-ओडिशाला तडाखा
स्पेनमध्ये दोन हायस्पीड ट्रेन आदळून ३० ठार
डी.के. इट्स डन ब्रो ! कर्नाटकातील पराभवाबद्दल भाजपाकडून टोमणा
मोबाइल उत्पादन क्षेत्रातून ₹२५ हजार कोटींचा करमहसूल
दरम्यान, ही पिस्तुले सुरतमध्ये फेकून दिल्याची माहिती तपासात समोर आल्याचे पोलिसांनी सांगितले. शस्त्रे नेमकी कुठे टाकण्यात आली, त्यांची वाहतूक कोणत्या मार्गाने झाली आणि ती लपवण्यासाठी कोणत्या साधनांचा वापर करण्यात आला, याचा शोध गुन्हे शाखा घेत आहे.
या कटात कथित टोळीचा हस्तक अनिल पंडित याची नेमकी भूमिका काय होती, याचाही तपास सुरू आहे. त्याचा या कटातील सहभाग अद्याप पूर्णपणे स्पष्ट झालेला नाही. शस्त्रे नेण्यासाठी कोणत्या बॅगचा वापर करण्यात आला, ती कुठे लपवण्यात आली आणि आरोपींना तांत्रिक तसेच लॉजिस्टिक मदत कोणी पुरवली, याची माहिती मिळवण्यासाठी पोलीस कोठडी आवश्यक असल्याचे पोलिसांनी न्यायालयात सांगितले.
आरोपी आणि हल्लेखोर हरियाणातील असल्याने मुंबईत त्यांना मदत करणारे स्थानिक संपर्क कोण होते, याचाही शोध घेतला जात आहे. आरोपी राहत असलेल्या हॉटेलच्या परिसराचा पंचनामाही पोलिसांनी केला आहे.
