बिहारमधील नालंदा जिल्ह्यातील बिहार शरीफ परिसरातील शेरपूर-थवई भागात शिवमंदिरात तोडफोड केल्याच्या आरोपावरून तीन अल्पवयीन मुस्लिम मुलांना पोलिसांनी ताब्यात घेतले. १२ सप्टेंबर रोजी शनिवारी घडलेल्या या प्रकाराचे दृश्य मंदिर परिसरातील सीसीटीव्ही कॅमेऱ्यात कैद झाले.
सीसीटीव्ही चित्रणात तीन मुले मंदिराच्या लोखंडी जाळीच्या बाहेरून मंदिराच्या दिशेने वीट आणि दगड फेकताना दिसत असल्याचे सांगण्यात आले आहे. तसेच त्यांनी मंदिराच्या परिसरात लघुशंका केल्याचे आणि शिवीगाळ केल्याचेही चित्रणात दिसून आल्याचा दावा करण्यात आला आहे. या प्रकाराची माहिती स्थानिक नागरिकांना मिळाल्यानंतर परिसरात चिंता निर्माण झाली आणि पोलिसांना याबाबत कळवण्यात आले.
शनिवारी सायंकाळी स्थानिक तरुण सूरज कुमार पूजा करण्यासाठी मंदिरात गेले होते. त्यावेळी मंदिर परिसरात दगड आणि विटांचे तुकडे विखुरलेले त्यांना दिसले. सुरुवातीला त्यांनी परिसराची स्वच्छता केली. मात्र, त्यानंतर मंदिरातील सीसीटीव्ही चित्रण तपासले असता दुपारी सुमारे २ वाजून ४५ मिनिटांच्या सुमारास तीन मुले परिसरात आल्याचे आणि त्यांनी हा प्रकार केल्याचे समोर आल्याचे सांगण्यात आले.
माहिती मिळताच पोलिसांनी मंदिरात पोहोचून सीसीटीव्ही चित्रणाची तपासणी केली. पोलिसांनी प्रसिद्ध केलेल्या निवेदनानुसार, अंदाजे चार ते पाच वर्षे वयाच्या तीन मुलांनी हनुमानाच्या मूर्तीचे नुकसान करण्याचा प्रयत्न केला. पोलिसांनी तिन्ही मुलांना ताब्यात घेऊन त्यांची चौकशी केली. त्यानंतर त्यांना सोडण्यात आले. या प्रकरणी पोलिसांना लेखी तक्रारही प्राप्त झाली आहे.
हे ही वाचा:
पश्चिम बंगालमध्ये गणेशपूजांची संख्या १ लाखांपार
आंतरराष्ट्रीय बाजारात तांब्याचा भाव विक्रमी पातळीवर
राजस्थानमध्ये पालिका निवडणुकीत भाजपची पकड कायम
२४ कॅरेट सोन्याचे मोदक फक्त २७ हजार रुपये किलो
मुले कुणाच्या प्रभावाखाली?
स्थानिक नागरिकांपैकी काहींनी या मुलांकडून हा प्रकार कोणाच्या प्रभावाखाली करण्यात आला असावा, अशी शंका व्यक्त केली आहे. त्यामुळे या प्रकरणाचा सखोल तपास करून दोषी आढळणाऱ्यांवर कठोर कारवाई करावी, अशी मागणी नागरिकांनी केली आहे.
घटनेनंतर परिसरात पुन्हा तणाव निर्माण होऊ नये, यासाठी मंदिराजवळ पोलिसांचा बंदोबस्त तैनात करण्यात आला आहे. १३ सप्टेंबर रोजी रविवारी बजरंग दलाच्या कार्यकर्त्यांनी मंदिराला भेट देऊन परिस्थितीची पाहणी केली. या प्रकरणात कठोर कारवाई करण्याची मागणीही त्यांनी केली. सूरज कुमार यांनी सांगितले की, सीसीटीव्ही चित्रण पाहिल्यानंतर परिस्थिती अधिक चिघळू नये यासाठी नागरिकांनी तातडीने प्रशासनाला माहिती दिली.
मंदिराकडे जाणाऱ्या काही मार्गांवर अतिक्रमण झाले असून, त्यातील एका रस्त्याचा मार्गही बंद करण्यात आल्याचा दावा त्यांनी केला. त्यामुळे भाविकांना मंदिरात पोहोचण्यास अडचणी येत असल्याचे त्यांनी सांगितले. या परिसरात यापूर्वीही अशा प्रकारच्या घटना घडल्याचा दावा स्थानिकांकडून करण्यात आला आहे.
मंदिरात पूजा करणारे अमन कुमार यांनी सांगितले की, हा परिसर प्रामुख्याने मुस्लिमबहुल असून येथे एकच मंदिर आहे. मंदिराच्या परिसरात काही समाजकंटक जमा होत असल्याचा आरोप त्यांनी केला. मंदिराच्या प्रवेशद्वारावर जाणूनबुजून दगडफेक करण्यात आली आणि मंदिराच्या आत लघुशंका करण्यात आल्याचे त्यांनी म्हटले.
बिहारमध्ये मंदिरातील मूर्तींचे नुकसान किंवा धार्मिक स्थळांची विटंबना झाल्याच्या यापूर्वीही काही घटना समोर आल्या आहेत. मार्च २०२५ मध्ये समस्तीपूर जिल्ह्यातील दधिया बेलार गावातील मंदिरातील हनुमानाच्या मूर्तीचे नुकसान झाल्याची घटना घडली होती. २८ मार्च रोजी करपुरी ग्राम पोलिस ठाण्याच्या हद्दीत ही घटना समोर आली होती. अज्ञात व्यक्तींनी मंदिराच्या आत दगडफेक केल्याने मूर्तीचा एक भाग खराब झाल्याचे स्थानिकांनी सांगितले होते.
२४ ऑक्टोबर २०२४ रोजी भागलपूर जिल्ह्यातील सनहौला परिसरात शिवशक्ती मंदिरातही तोडफोड झाल्याची घटना समोर आली होती. तलावाजवळ असलेल्या या मंदिरातील भगवान राम, लक्ष्मण, माता सीता, राधा-कृष्ण आणि माँ दुर्गा यांच्या मूर्तींचे नुकसान झाल्याचे वृत्त होते. मंदिराचे पुजारी सकाळी सुमारे ७ वाजता मंदिरात पोहोचल्यानंतर हा प्रकार त्यांच्या निदर्शनास आला होता.
