कर्नाटकात मध्ये मोठ्या राजकीय बदलाची चिन्हे दिसू लागली असून मुख्यमंत्री सिद्धरामय्या गुरुवारी राजीनामा देण्याची शक्यता आहे. तसेच उद्या बेंगळुरूमध्ये पत्रकार परिषद घेण्याचीही अपेक्षा असल्याचे सूत्रांनी सांगितले.
आणखी एका महत्त्वाच्या घडामोडीत, सिद्धरामय्या गुरुवारी सकाळी आपल्या निवासस्थानी संपूर्ण कर्नाटक मंत्रिमंडळासाठी नाश्त्याची बैठक आयोजित करण्याची शक्यता आहे. या हालचालीमुळे राज्यात सत्तांतराच्या चर्चांना आणखी वेग आला आहे.
हे ही वाचा:
हे दुसरे चक्रव्यूह मोदी भेदतील काय?
SEBIचा नवा प्रस्ताव; ऑप्शन्स ट्रेडिंगचे नियम बदलणार
भारताच्या सुखोई विमानांना अत्याधुनिक संरक्षण कवच
पश्चिम बंगालमध्ये भ्रष्टाचाराच्या आरोपांवरून तृणमूलचे दोन नेते अटकेत
रणदीप सुरजेवाला काँग्रेसचे सरचिटणीस आणि कर्नाटक प्रभारी रणदीप सुरजेवाला हे या वेगाने घडणाऱ्या राजकीय घडामोडींच्या पार्श्वभूमीवर गुरुवारी बेंगळुरूत पोहोचणार आहेत. सूत्रांनुसार, पक्ष नेतृत्व सत्तांतर सुरळीत पार पाडण्यासाठी आणि गटबाजी नियंत्रणात ठेवण्यासाठी सुरजेवाला राज्यातील प्रमुख काँग्रेस नेत्यांसोबत बैठक घेण्याची शक्यता आहे.
सूत्रांनी असेही सांगितले की, नेतृत्वबदल औपचारिकरित्या झाला तरी कर्नाटक काँग्रेस विधिमंडळ पक्षातील अंतर्गत संघर्ष सुरूच राहण्याची शक्यता आहे. विविध गट सरकारच्या पुढील टप्प्यावर नियंत्रण मिळवण्यासाठी आक्रमकपणे प्रयत्न करतील.
गेल्या काही दिवसांपासून दिल्लीमध्ये कर्नाटक नेतृत्व आणि काँग्रेस हायकमांड यांच्यात सुरू असलेल्या पडद्यामागील चर्चांनंतर ही संभाव्य घोषणा अपेक्षित आहे. या चर्चांमध्ये सिद्धरामय्यांना राज्यसभेमार्फत राष्ट्रीय राजकारणात जाण्याचा आणि २०२९ लोकसभा निवडणुकांपूर्वी मोठी संघटनात्मक भूमिका स्वीकारण्याचा सल्ला देण्यात आल्याचे सांगितले जाते.
सूत्रांनुसार, राहुल गांधी सामाजिक न्याय आणि जातीय समीकरणांवर आधारित काँग्रेसची रणनीती तीव्र करत असताना, पक्ष नेतृत्व सिद्धरामय्यांना राष्ट्रीय स्तरावर काँग्रेसचा प्रमुख ओबीसी चेहरा बनवू इच्छित आहे.
सिद्धरामय्या यांना बैठकीत सांगण्यात आले की राष्ट्रीय स्तरावर ओबीसी मतदारांना एकत्र आणण्यासाठी पक्षाला दिल्लीमध्ये त्यांच्या उपस्थितीची गरज आहे आणि काँग्रेसच्या दीर्घकालीन निवडणूक रणनीतीत त्यांची राजकीय प्रतिमा महत्त्वाची भूमिका बजावेल.
सूत्रांनी असेही म्हटले की नेतृत्वाने सिद्धरामय्यांना आश्वासन दिले आहे की त्यांनी सत्तांतर योजना मान्य केल्यास “त्यांच्या इतर सर्व बाबी आणि अडचणींची काळजी घेतली जाईल”.
या घडामोडी दिल्लीमध्ये झालेल्या मॅरेथॉन बैठकीनंतर समोर आल्या आहेत. या बैठकींमध्ये सिद्धरामय्या, उपमुख्यमंत्री डी के शिवकुमार काँग्रेस अध्यक्ष मल्लिकार्जुन खरगे, राहुल गांधी, के सी वेणूगोपाल आणि रणदीप सुरजेवाला सहभागी झाले होते.
काँग्रेसने सार्वजनिकरित्या या चर्चा फक्त राज्यसभा आणि कर्नाटक विधान परिषद निवडणुकांपुरत्या मर्यादित असल्याचे म्हटले असले, तरी सूत्रांनी सांगितले की कर्नाटकातील नेतृत्वबदल हा चर्चेचा मुख्य केंद्रबिंदू होता.
संभाव्य राजीनाम्यामुळे कर्नाटकातील काँग्रेसमधील न सुटलेला सत्तावाटपाचा संघर्ष पुन्हा एकदा समोर आला आहे. २०२३ मध्ये काँग्रेस पुन्हा सत्तेत आल्यानंतरपासून उपमुख्यमंत्री डीके शिवकुमार यांच्या समर्थकांनी सरकार स्थापन होताना मुख्यमंत्रीपदाची रोटेशन पद्धती मान्य झाल्याचा दावा वारंवार केला आहे.
