घरराजकारणकाँग्रेसकडून उपदेशाची गरज नाही

काँग्रेसकडून उपदेशाची गरज नाही

ट्रम्प-शी-पुतिन बैठकीवरून लक्ष्य करणाऱ्या राहुल गांधींवर भाजपचा पलटवार

अमेरिकेचे राष्ट्राध्यक्ष डोनाल्ड ट्रम्प, चीनचे राष्ट्राध्यक्ष शी जिनपिंग आणि रशियाचे राष्ट्राध्यक्ष व्लादिमीर पुतीन यांच्या त्रिपक्षीय बैठकीवरून काँग्रेस नेते राहुल गांधी यांनी पंतप्रधान नरेंद्र मोदी यांच्यावर टीका केली. त्याला भाजपने जोरदार प्रत्युत्तर दिले आहे. राहुल गांधी यांनी परदेशात जाऊन भारताची आंतरराष्ट्रीय प्रतिमा मलिन करण्याचा प्रयत्न करू नये. परराष्ट्र धोरणावर काँग्रेसकडून धडे घेण्याची भाजपला गरज नाही, अशा शब्दांत भाजप नेत्यांनी त्यांच्यावर निशाणा साधला.

राहुल गांधी यांनी शुक्रवारी (२० नोव्हेंबर) ट्रम्प, जिनपिंग आणि पुतीन यांच्या बैठकीचा फोटो सोशल मीडियावर शेअर केला. ‘काँग्रेस सत्तेत असती, तर भारताचे पंतप्रधानही या टेबलावर बसले असते. तडजोड केलेले पंतप्रधान या टेबलावर कधीच बसू शकत नाहीत,’ अशी टीका त्यांनी केली. या वक्तव्याच्या माध्यमातून त्यांनी मोदी सरकारच्या परराष्ट्र धोरणावर आणि जागतिक स्तरावरील भारताच्या स्थानावर प्रश्न उपस्थित केले.

भाजपचे प्रवक्ते सी. आर. केसवन यांनी राहुल गांधी यांच्या वक्तव्याचा निषेध केला. परदेशात बसून भारताची आंतरराष्ट्रीय प्रतिमा खराब करण्याचा प्रयत्न करणे आक्षेपार्ह आणि निषेधार्ह असल्याचे त्यांनी म्हटले. राहुल गांधी यांची वक्तव्ये पाकिस्तानच्या बाजूने प्रचार करणाऱ्यांसारखी असल्याची टीकाही त्यांनी केली. पंतप्रधान मोदी यांच्या नेतृत्वाखाली भारत जागतिक स्तरावर विविध देशांमध्ये समन्वय आणि सहमती निर्माण करणारा देश म्हणून पुढे आला आहे, असा दावा केसवन यांनी केला.

भाजपचे प्रवक्ते प्रदीप भंडारी यांनीही राहुल गांधी यांच्यावर निशाणा साधला. ‘राहुल गांधी यांचे पाकिस्तानवर एवढे लक्ष का असते? प्रत्येक आंतरराष्ट्रीय व्यासपीठावर ते पाकिस्तानचे समर्थक असल्यासारखे वागतात,’ अशा शब्दांत त्यांनी टीका केली. भारताच्या परराष्ट्र धोरणासाठी पाकिस्तानला आदर्श म्हणून मांडण्याचा प्रयत्न राहुल गांधी करत असल्याचा आरोपही त्यांनी केला.

हे ही वाचा:

कुख्यात गुंड नसीम दुर्रानी चकमकीत ठार

अमित देशमुखांकडून टिपू सुलतानचा उदो उदो!

अखिलेश अयोध्येत उतरले तर मीही भिडणार; योगींचा हुंकार!

इस्रायलवरून राहुल गांधींची पलटी

दरम्यान, राहुल गांधी यांनी यापूर्वी अमेरिकेतील शिकागो विद्यापीठात विद्यार्थ्यांशी संवाद साधताना भारत जागतिक राजकारणात दुय्यम भूमिकेत गेला असल्याचे म्हटले होते. पाकिस्तान अमेरिका आणि इराण यांच्यातील चर्चेत मध्यस्थी करत असताना भारत केवळ पाहत असल्याची टीकाही त्यांनी केली होती. या वक्तव्यांवरूनही भाजपने त्यांच्यावर टीका केली होती. त्यामुळे ट्रम्प, जिनपिंग आणि पुतीन यांच्या बैठकीवरून सुरू झालेला हा वाद आता भाजप-काँग्रेसमधील परराष्ट्र धोरणाच्या राजकीय संघर्षाचे रूप घेत आहे.

प्रतिक्रिया द्या

कृपया आपली टिप्पणी द्या!
कृपया येथे आपले नाव प्रविष्ट करा

The reCAPTCHA verification period has expired. Please reload the page.

Exit mobile version