बेंगळुरू येथील बीसीसीआय सेंटर ऑफ एक्सलन्सच्या ग्राउंड-२ वर सुरू असलेल्या दुलीप ट्रॉफी २०२६ मधील दक्षिण आणि उत्तर विभाग यांच्यातील दुसरा उपांत्य सामना पहिल्याच दिवशी अत्यंत रोमांचक झाला आहे. उत्तर विभागाला अवघ्या १९५ धावांवर गुंडाळल्यानंतर दक्षिण विभागाने दिवसअखेर २ विकेट गमावून केवळ ४० धावा केल्या आहेत.
नाणेफेक जिंकून प्रथम फलंदाजी करण्यासाठी उतरलेला उत्तर विभागाचा संघ पहिल्या डावात केवळ १९५ धावांवर सर्वबाद झाला. सनथ सांगवानने कामरान इक्बालसोबत पहिल्या विकेटसाठी अवघ्या १८ धावांची भागीदारी केली. सनथ १० धावा करून बाद झाला.
त्यानंतर कामरानने आयुष दोसेजासोबत दुसऱ्या विकेटसाठी ६६ चेंडूंमध्ये ५३ धावांची भागीदारी केली. आयुषने ५ चौकारांसह २३ धावा करून माघारी परतला. संघाला ७१ धावांवर दुसरा धक्का बसला आणि त्यानंतर ९५ धावांपर्यंत ४ विकेट पडल्या. मात्र, कामरानने एक बाजू लावून धरली.
हे ही वाचा:
बदलापूरमध्ये सेफ्टी बेल्ट तुटल्याने चिमुकला सातव्या थराहून थेट खाली कोसळला
मैसूर एक्सप्रेस’ जवागल श्रीनाथ!
‘कॉक्रोच’ नेत्यांमध्ये राजकीय महत्त्वाकांक्षा
आयआयटी प्रवेशाच्या नावाखाली मोठी फसवणूक
कामरानने कर्णधार कन्हैया वधावनसोबत पाचव्या विकेटसाठी ६६ धावांची भागीदारी करत संघाला संकटातून सावरण्याचा प्रयत्न केला. सलामीवीर म्हणून मैदानात उतरलेल्या कामरानने १० चौकार आणि १ षटकारासह ७६ धावांची खेळी केली. तर अब्दुल समदने १६ धावा आणि कन्हैयाने ३५ धावांचे योगदान दिले.
साऊथ झोनकडून विद्वथ कावेरप्पाने ६६ धावांत ४ विकेट घेतल्या. एम.डी. निधीश आणि तनय त्यागराजन यांनी प्रत्येकी २ विकेट घेतल्या, तर कावुरी साईतेजा आणि श्रेयस गोपाळ यांना प्रत्येकी १ विकेट मिळाली. प्रत्युत्तरात साऊथ झोनने दिवसअखेर १८ षटके खेळली आणि २ विकेट गमावून ४० धावा केल्या. रिकी भुईने नारायण जगदीसनसोबत पहिल्या विकेटसाठी ३४ धावांची भागीदारी केली. रिकी ३९ चेंडूंमध्ये ५ धावा करून बाद झाला, त्यानंतर जगदीसनने डावाची जबाबदारी सांभाळली.
त्याने दिवसअखेर ५८ चेंडूंचा सामना करत नाबाद ३४ धावा केल्या. नॉर्थ झोनकडून अंशुल कंबोज आणि गुरनूर बरार यांनी प्रत्येकी १ विकेट घेतली आहे.
