भारतीय कुस्तीपटू विनेश फोगाट हिला दिल्ली उच्च न्यायालयाने दिलासा दिला आहे. भारतीय कुस्ती महासंघाने (डब्ल्यूएफआय) बजावलेल्या दोन कारणे दाखवा नोटिसांवर दोन आठवड्यांच्या आत निर्णय घ्यावा, असे निर्देश न्यायालयाने महासंघाला दिले आहेत.
न्यायमूर्ती अमित महाजन यांच्या खंडपीठासमोर या प्रकरणाची सुनावणी झाली. शिस्तभंगाच्या कारवाईबाबत निर्माण झालेली अनिश्चितता खेळाडूच्या मानसिक तयारीवर परिणाम करू शकते, असे न्यायालयाने नमूद केले. स्पर्धेत सहभागी होण्यासाठी खेळाडू मानसिकदृष्ट्या सक्षम, तणावमुक्त आणि आत्मविश्वासपूर्ण असणे आवश्यक असल्याचेही न्यायालयाने स्पष्ट केले.
विनेशने ९ मे आणि १७ जून रोजी जारी करण्यात आलेल्या दोन कारणे दाखवा नोटिसांना उच्च न्यायालयात आव्हान दिले होते. आगामी स्पर्धेच्या अगदी आधी महासंघ तिच्याविरोधात प्रतिकूल निर्णय घेऊ शकतो, अशी भीती तिने याचिकेत व्यक्त केली होती.
डिसेंबर २०२६ च्या मध्यात राष्ट्रीय कुस्ती स्पर्धा होणार असल्याने विनेशला तयारीसाठी पुरेसा वेळ हवा आहे. मात्र, प्रलंबित नोटिसांमुळे तिच्यावर अनिश्चिततेची टांगती तलवार असल्याचे तिच्या वकिलांनी न्यायालयात सांगितले.
यावर न्यायालयाने दोन्ही नोटिसांवर दोन आठवड्यांत निर्णय घेण्याचे निर्देश दिले. निर्धारित मुदतीनंतर निर्णय घेतल्यास पुढील सुनावणीपर्यंत त्याची अंमलबजावणी करू नये, असेही न्यायालयाने स्पष्ट केले.
दरम्यान, शिस्तभंग आणि डोपिंगविरोधी नियमांचे उल्लंघन केल्याच्या आरोपांवरून कुस्ती महासंघाने विनेशला नोटिसा बजावल्या होत्या. निवृत्तीनंतर पुनरागमन करताना आंतरराष्ट्रीय कुस्ती महासंघाच्या सहा महिन्यांच्या पूर्वसूचना नियमाचे पालन न करणे, तसेच डोपिंग चाचणीसाठी आवश्यक ठिकाणाची माहिती आणि औपचारिकता पूर्ण न केल्याचे आरोप महासंघाने केले होते.
