आशिया कपच्या मैदानावर पुन्हा एकदा भारत-पाकिस्तान संघर्षाची ठिणगी पडणार आहे! अंडर-१९ आशिया कप २०२६ च्या अंतिम फेरीत भारतीय युवा शिलेदारांनी दिमाखात प्रवेश केला असून, आता विजेतेपदासाठी पारंपरिक प्रतिस्पर्धी पाकिस्तानशी दोन हात होणार आहेत. गुरुवारी झालेल्या उपांत्य सामन्यात भारताने अफगाणिस्तानचा ८ विकेट्सनी धुव्वा उडवत अंतिम फेरीचे तिकीट दिमाखात मिळवले.
प्रथम फलंदाजी करताना अफगाणिस्तानने ५० षटकांत ८ बाद २२७ धावा उभारल्या. नोमान सलारजई आणि शाह फैजल रहीमी यांनी प्रत्येकी ५१ धावांची खेळी करत डावाला आकार दिला, तर कर्णधार सोहेल खानने नाबाद ३६ धावा फटकावल्या. भारताकडून ईशान सूदने भेदक गोलंदाजी करत ३ फलंदाजांना तंबूचा रस्ता दाखवला. आर्यन सावसानीनेही २ विकेट्स घेत अफगाणिस्तानच्या धावांना लगाम घातला.
२२८ धावांचे लक्ष्य घेऊन मैदानात उतरलेल्या भारतीय फलंदाजांनी सुरुवातीपासूनच आक्रमक पवित्रा घेतला. कर्णधार लक्ष्य रायचंदानी आणि आर्यवीर सेहवाग यांनी अफगाणिस्तानच्या गोलंदाजांवर हल्ला चढवत पहिल्या विकेटसाठी ११७ धावांची तडाखेबंद भागीदारी केली. आर्यवीरने ५१ धावांची खेळी केली, तर लक्ष्यने १३ चौकार आणि एका षटकारासह ९३ धावांची शानदार खेळी साकारली. मात्र, शतकाने त्याला अवघ्या सात धावांनी हुलकावणी दिली.
यानंतर व्ही. के. विनीतने संयमी आणि आक्रमक फलंदाजीचा सुरेख मिलाफ साधत नाबाद ५७ धावा ठोकल्या. यशवर्धन चौहानने नाबाद १६ धावांची साथ दिली. भारतीय संघाने अवघ्या ३६.५ षटकांत २ विकेट्सच्या मोबदल्यात विजयाचे लक्ष्य गाठले आणि अफगाणिस्तानला स्पर्धेबाहेरचा रस्ता दाखवला.
आता सर्वांच्या नजरा १४ नोव्हेंबरकडे लागल्या आहेत. अंतिम सामन्यात भारत आणि पाकिस्तान आमनेसामने येणार असल्याने क्रिकेटप्रेमींना पुन्हा एकदा मैदानावर महामुकाबल्याचा थरार अनुभवायला मिळणार आहे. अफगाणिस्तानविरुद्धचा विजयी फॉर्म कायम राखत भारतीय युवा संघ आशिया कपवर नाव कोरणार का, याचीच उत्सुकता शिगेला पोहोचली आहे.
