भारतीय बुद्धिबळपटू आर. प्रज्ञानंदनने आपल्या कारकिर्दीतील ऐतिहासिक कामगिरी करत ग्रँड चेस टूर फायनलचं विजेतेपद पटकावलं आहे. अमेरिकेचा ग्रँडमास्टर फॅबियानो कारुआना याच्यावर १५-१३ असा विजय मिळवत ही प्रतिष्ठेची स्पर्धा जिंकणारा प्रज्ञानंदन पहिला भारतीय ठरला आहे. विशेष म्हणजे, अंतिम टप्प्यात तब्बल सहा गुणांनी पिछाडीवर असतानाही त्याने जबरदस्त पुनरागमन करत विजेतेपदावर नाव कोरलं. या विजयामुळे प्रज्ञानंदनच्या कारकिर्दीत आणखी एका मोठ्या विक्रमाची नोंद झाली आहे. या विजेतेपदासाठी त्याला दोन लाख अमेरिकी डॉलरची बक्षीस रक्कम मिळाली.
फायनलच्या सुरुवातीला कारुआनाने प्रज्ञानंदनवर दबाव निर्माण केला होता. क्लासिकल सामन्यांनंतर कारुआनाने सहा गुणांची भक्कम आघाडी मिळवली होती. पहिल्या क्लासिकल सामन्यात प्रज्ञानंदनला तब्बल ०-६ असा पराभव स्वीकारावा लागला. त्यामुळे त्याच्यासमोर मोठं आव्हान उभं राहिलं होतं. दुसऱ्या क्लासिकल सामन्यात मात्र प्रज्ञानंदनने चांगली झुंज दिली. हा सामना ३-३ असा बरोबरीत सुटला. त्यामुळे कारुआनाची आघाडी कायम राहिली आणि विजेतेपदासाठी प्रज्ञानंदनला पुढील रॅपिड आणि ब्लिट्झ सामन्यांमध्ये मोठी कामगिरी करण्याची गरज होती.
क्लासिकल सामन्यांनंतर सहा गुणांनी पिछाडीवर असलेल्या प्रज्ञानंदनने रॅपिडमध्ये मात्र सामन्याचं चित्र पूर्णपणे बदलून टाकलं. त्याने दोन्ही रॅपिड सामने जिंकत कारुआनावर दबाव आणला. या दोन विजयांमुळे प्रज्ञानंदनच्या आत्मविश्वासात मोठी वाढ झाली. दुसरीकडे, कारुआनावर विजेतेपद टिकवण्याचा दबाव वाढत गेला. रॅपिडमधील दमदार कामगिरीनंतर प्रज्ञानंदनने ब्लिट्झमध्येही आपली लय कायम ठेवली. विजेतेपदाचा निर्णय चार ब्लिट्झ सामन्यांमध्ये होणार होता. या टप्प्यावर प्रज्ञानंदनने अत्यंत संयमी आणि अचूक खेळ केला. कारुआनाने पुनरागमन करण्याचा प्रयत्न केला, मात्र प्रज्ञानंदनने त्याला फारशी संधी दिली नाही. चार ब्लिट्झ सामन्यांमध्ये मिळालेली आघाडी कायम राखत प्रज्ञानंदनने अखेर १५-१३ अशा अंतिम गुणफरकाने विजेतेपदावर शिक्कामोर्तब केलं.
हे ही वाचा:
तिबेटमध्ये नेपाळ सीमेजवळ आणखी एक तलाव फुटला; पुन्हा महापुराचा धोका
आठ सिमकार्ड पाकिस्तानात पाठवणारे दाम्पत्य अटकेत
कॅनडाला डिवचलं? ट्रम्प यांनी लेक ऑन्टारिओचं नाव केलं ‘लेक अमेरिका’
ग्रँड चेस टूर फायनलचं विजेतेपद हे प्रज्ञानंदनच्या कारकिर्दीतील आतापर्यंतच्या सर्वात मोठ्या खिताबांपैकी एक ठरलं आहे. या स्पर्धेत जगातील सर्वोत्तम बुद्धिबळपटू सहभागी होत असल्याने या विजयाचं महत्त्व अधिक आहे. विशेष म्हणजे, ग्रँड चेस टूर फायनल जिंकणारा तो पहिला भारतीय बुद्धिबळपटू ठरला आहे. त्यामुळे भारतीय बुद्धिबळाच्या इतिहासातही या विजयाची नोंद महत्त्वाची ठरणार आहे.
