अवघ्या १५व्या वर्षी बिहार क्रिकेट संघाच्या कर्णधारपदाची मोठी जबाबदारी मिळालेल्या युवा फलंदाज वैभव सूर्यवंशी याचे बिहारच्या क्रीडामंत्री श्रेयसी सिंह यांनी अभिनंदन केले आहे. सय्यद मुश्ताक अली करंडक स्पर्धेसाठी वैभवची बिहार संघाच्या कर्णधारपदी नियुक्ती करण्यात आली आहे. एवढ्या कमी वयात मोठी जबाबदारी मिळणे ही अभिमानाची बाब असल्याचे श्रेयसी सिंह यांनी म्हटले आहे.
पत्रकारांशी संवाद साधताना श्रेयसी सिंह म्हणाल्या, वैभव सूर्यवंशीला बिहार क्रिकेट संघाचे कर्णधारपद मिळाल्याबद्दल मनःपूर्वक शुभेच्छा. कमी वयात त्याच्यावर मोठी जबाबदारी सोपवण्यात आली आहे. तो या जबाबदारीचे योग्य पद्धतीने पालन करेल, असा विश्वास आहे. त्याच्या प्रशिक्षकांचेही मी अभिनंदन करते.
बिहारमधील खेळाडूंनी केवळ क्रिकेटमध्येच नव्हे, तर अन्य क्रीडा प्रकारांमध्येही प्रगती करावी, अशी अपेक्षा त्यांनी व्यक्त केली. भारताच्या ऑलिम्पिक पथकात बिहारमधील खेळाडूंचा मोठ्या प्रमाणात सहभाग असावा, हे आपले उद्दिष्ट असल्याचेही त्यांनी सांगितले.
बिहारमध्ये पहिल्यांदाच राज्यस्तरीय क्रीडा स्पर्धांचे आयोजन करण्यात येत आहे. राज्यात क्रीडा क्षेत्राशी संबंधित पायाभूत सुविधांचा विकास होत असून, विविध क्रीडा स्पर्धांचे सातत्याने आयोजन होणे आवश्यक आहे. अशा स्पर्धांमुळे खेळाडूंना आपली प्रतिभा दाखवण्यासाठी चांगले व्यासपीठ मिळेल आणि त्यांना पुढे जाण्याची संधी उपलब्ध होईल, असेही श्रेयसी सिंह म्हणाल्या.
दरम्यान, १५ वर्षीय वैभव सूर्यवंशी हा भारतीय क्रिकेटमधील चर्चेचा युवा चेहरा आहे. आंतरराष्ट्रीय क्रिकेटमध्ये भारताकडून खेळणारा सर्वांत कमी वयाचा क्रिकेटपटू होण्याचा विक्रम त्याच्या नावावर आहे. आता सय्यद मुश्ताक अली करंडक स्पर्धेत बिहार संघाचे नेतृत्व करण्याची जबाबदारी त्याच्यावर सोपवण्यात आली आहे. कर्णधारपदासोबतच आपल्या आक्रमक फलंदाजीच्या जोरावर बिहार संघाला विजय मिळवून देण्याचे आव्हान त्याच्यासमोर असेल.
सय्यद मुश्ताक अली करंडक स्पर्धेतील पहिल्या दोन सामन्यांसाठी बिहारचा संघ : वैभव सूर्यवंशी (कर्णधार), आलोक कुमार, आयुष लोहारुका, अल्तमिश अश्रफ, तरुण कुमार सिंह, अनमोल कुमार (यष्टिरक्षक), सूरज कश्यप (उपकर्णधार), मयंक कुमार, रघुवेंद्र प्रताप, आशीष कुमार, वासुदेव प्रसाद, पृथ्वीराज, मोहम्मद इजहार, अमोद यादव, प्रशांत सिंह, नवाज खान आणि हिमांशू सिंह.
राखीव खेळाडू : बिपिन सौरभ, सुमन कुमार, आकाश राज, खालिद आलम, भास्कर दुबे, कुमार रजनीश, सुयश, अभिजीत साकेत, यशस्वी ऋषभ, लखन राजा, पवन कुमार, अमित चौधरी, पीयूष सिंह, भानू कुमार, लोकेश बाबूलाल कुमार आणि प्रशांत श्रीवास्तव.
