पुण्यातील उद्योगपतीच्या रिसॉर्ट असेसमेंटवरून दिवेआगरचे सरपंच-उपसरपंचांत तुफान राडा

• पुण्यातील बड्या उद्योगपतीच्या रिसॉर्ट असेसमेंटवरून दिवेआगर ग्रामपंचायतीत हायव्होल्टेज ड्रामा.

• सरपंच विजय तोडणकर आणि उपसरपंच वसीम फकजी यांच्यात ग्रामपंचायत कार्यालयातच उडाली हमरीतुमरी.

• पोलिसांच्या हस्तक्षेपांनंतर दोन्ही बाजूंकडून एकमेकांवर परस्परविरोधी गुन्हे दाखल.

• तीर्थक्षेत्र आणि पर्यटन स्थळ असलेल्या दिवेआगरच्या कारभारावर ग्रामस्थांमधून तीव्र संताप; सखोल चौकशीची जोरदार मागणी.

रायगडच्या प्रसिद्ध तीर्थक्षेत्र आणि पर्यटन स्थळ असणाऱ्या दिवेआगर ग्रामपंचायतीमधून एक अत्यंत खळबळजनक बातमी समोर येत आहे. पुण्यातील एका बड्या उद्योगपतीच्या रिसॉर्टच्या असेसमेंटवरून सरपंच विजय तोडणकर आणि उपसरपंच वसीम फकजी यांच्यात तुफान राडा झाल्याची घटना घडली आहे. ग्रामपंचायत कार्यालयातच या दोन्ही पदाधिकाऱ्यांची थेट हमरीतुमरी उडाली असून, त्यांचा हा ‘रुद्रावतार’ पाहून सर्वसामान्यांचे डोळे पांढरे झाले आहेत.

नेमका वाद कशावरून?

दिवेआगर ग्रामपंचायतीच्या हद्दीत असलेल्या पुण्यातील एका बड्या उद्योगपतीच्या रिसॉर्टला असेसमेंट देण्याचा विषय समोर आला आणि याच मुद्याने अचानक पेट घेतला. कायदेशीर बाबी आणि कागदपत्रांवरून सुरू झालेली चर्चा पाहता पाहता विकोपाला गेली. सरपंच आणि उपसरपंच थेट एकमेकांच्या अंगावर धावून गेल्याने ग्रामपंचायत कार्यालयातील वातावरण चांगलेच तापले होते. लोकप्रतिनिधींच्याच कार्यालयात असा तमाशा सुरू झाल्याने नागरिक थक्क झाले आहेत.

पोलिसांची एन्ट्री अन् परस्परविरोधी गुन्हे!

वाद इतका टोकाला गेला की, अखेर या प्रकरणात पोलिसांना हस्तक्षेप करावा लागला. पोलिसांनी मध्यस्थी करत कसाबसा हा वाद शांत केला असला, तरी प्रकरण इथेच थांबलेले नाही. दोन्ही पदाधिकाऱ्यांकडून एकमेकांवर आरोप-प्रत्यारोप करत परस्परविरोधी गुन्हे दाखल करण्यात आले आहेत. या हायव्होल्टेज ड्रामाने संपूर्ण तालुक्यात एकच खळबळ उडवून दिली आहे.

कारभाराची सखोल चौकशी होणार का?

एका बड्या उद्योगपतीच्या रिसॉर्टच्या असेसमेंटसाठी जर गावाचे प्रथम आणि द्वितीय नागरिकच अशा प्रकारे आपसात भिडत असतील, तर यामागे डराळ राजकारण किंवा हितसंबंध दडलेले आहेत का, असा संतप्त सवाल आता ग्रामस्थ विचारत आहेत. या संपूर्ण प्रकारानंतर, दिवेआगर ग्रामपंचायतीचा कारभार नेमका कसा चालतोय याची सखोल चौकशी होण्याची मागणी जोर धरू लागली आहे!