मुंबईच्या कोस्टल रोड प्रकल्पाच्या बोगद्यात बुधवारी (१५ जुलै) धावत्या कारला अचानक भीषण आग लागल्याने खळबळ उडाली. यामुळे मोठी वाहतूक कोंडी झाली असून प्रवाशांना मनस्ताप सहन करावा लागला. ही घटना दक्षिण मार्गिकेच्या बोगद्यात घडली. प्रसंगावधान राखत कारमधील प्रवाशांनी वेळेत बाहेर पडल्यामुळे कोणतीही जीवितहानी झालेली नाही. मात्र, या घटनेमुळे बोगद्यात काही काळ धुराचे मोठे लोट पसरले आणि सुरक्षिततेच्या कारणास्तव वाहतूक तातडीने बंद करण्यात आली.
घटनास्थळी मुंबई अग्निशमन दल, वाहतूक पोलीस आणि बृहन्मुंबई महापालिकेचे (BMC) अधिकारी तातडीने दाखल झाले आहेत. अग्निशमन दलाने काही वेळातच आगीवर नियंत्रण मिळवले असून आगीमुळे कार पूर्णपणे जळून खाक झाली. प्राथमिक माहितीनुसार, आगीचे नेमके कारण अद्याप स्पष्ट झाले नसून विद्युत बिघाड किंवा इंजिनमधील तांत्रिक दोष असण्याची शक्यता तपासली जात आहे. लवकरच वाहतूक सुरळीत सुरू केली जाण्याची शक्यता वर्तवण्यात येत आहे.
हे ही वाचा:
मालेगावातील SIR प्रक्रियेत ‘व्होट जिहाद’? एकाच मतदाराची अनेक ठिकाणी नोंद
पीओके आंदोलनात लष्कर, जैशच्या दहशतवाद्यांना घुसवण्याचा कट?
संयुक्त राष्ट्र सुरक्षा परिषदेच्या निष्क्रियतेमुळे यूएनवरील विश्वास ढासळतोय
पुतिन यांना अण्वस्त्र वापरण्यापासून पंतप्रधान मोदींनी रोखले!
आग लागल्यानंतर बोगद्यात दाट धूर पसरल्याने सुरक्षेच्या दृष्टीने दोन्ही दिशांतील वाहतूक काही काळ थांबवण्यात आली. यामुळे कोस्टल रोडसह बोगद्यात अनेक वाहने अडकून पडली. वाहनांच्या लांबच लांब रांगा लागल्या असून वाहतूक कोंडी निर्माण झाली आहे. वाहतूक कोंडी टाळण्यासाठी पोलिसांनी वाहनांना हाजी अली आणि वरळी कनेक्टरमार्गे पर्यायी मार्गांवर वळवले.
