भारतासोबत २०१९ मध्ये व्यापार बंद केल्यानंतर पाकिस्तानला आतापर्यंत अंदाजे ४० अब्ज डॉलरचे आर्थिक नुकसान झाल्याचा दावा करण्यात आला आहे. पुलवामा दहशतवादी हल्ला आणि त्यानंतर दोन्ही देशांमधील वाढलेल्या तणावाच्या पार्श्वभूमीवर भारत-पाकिस्तानमधील व्यापार ठप्प झाला होता. या व्यापारबंदीमुळे पाकिस्तानचे मोठे आर्थिक नुकसान झाल्याचे वृत्त प्रेस ट्रस्ट ऑफ इंडिया (पीटीआय)ने एका व्यावसायिक संघटनेच्या प्रमुखाच्या हवाल्याने दिले आहे.
पाकिस्तान-इंडिया बिझनेस कौन्सिलचे (पीआयबीसी) अध्यक्ष नूर मोहम्मद कसुरी यांनी दोन्ही देशांनी पुन्हा एकदा व्यावसायिक संबंध पूर्ववत करावेत, असे आवाहन केले आहे. भारत आणि पाकिस्तानमधील व्यापार पुन्हा सुरू झाल्यास दोन्ही देशांमधील उद्योग-व्यवसायांना फायदा होईल. तसेच गुंतवणूक, पर्यटन आणि प्रादेशिक सहकार्याच्या नव्या संधी निर्माण होतील, असे त्यांनी म्हटले आहे.
कसुरी यांनी सांगितले की, भारतासोबतचा व्यापार बंद झाल्यामुळे पाकिस्तानमधील उद्योगांना आवश्यक कच्चा माल आणि वस्तू दूरच्या देशांमधून आयात कराव्या लागत आहेत. त्यामुळे वाहतूक आणि मालवाहतुकीचा खर्च वाढला असून वस्तूंच्या वितरणासाठी लागणारा वेळही वाढला आहे.
पीटीआयच्या वृत्तानुसार, भारतातून कच्चा माल आयात केल्यास पाकिस्तानच्या औषधनिर्मिती उद्योगाला दरवर्षी २ ते ३ अब्ज डॉलरची बचत होऊ शकते. कारण औषधनिर्मितीसाठी आवश्यक असलेल्या अनेक कच्च्या मालासाठी पाकिस्तान भारतीय बाजारपेठेवर अवलंबून राहू शकतो. कसुरी यांनी सांगितले की, पाकिस्तानच्या कापड उद्योगालाही भारतासोबतचा व्यापार बंद झाल्याचा मोठा आर्थिक फटका बसला आहे. देशांतर्गत कापूस उत्पादन घटल्यामुळे गिरण्यांना ब्राझील, इजिप्त, चीन आणि अमेरिका या देशांमधून कापूस आयात करावा लागत आहे. त्यामुळे पाकिस्तानच्या कापड उद्योगावर अंदाजे अतिरिक्त ५ अब्ज डॉलरचा खर्च पडल्याचे त्यांनी नमूद केले.
हे ही वाचा:
भारतीय नागरिक असल्यासारखे वागू नका!
सेंथिलकुमारची चेक ओपनच्या अंतिम फेरीत धडक
पंजाबमध्ये ‘आप’ला गळती; आणखी एका आमदाराचा राजीनामा
प्रदर्शनापूर्वीच ‘रामायण’च्या ११ लाखांहून अधिक तिकिटांची विक्री
कसुरी यांच्या मते, भारत आणि पाकिस्तानमधील द्विपक्षीय व्यापार पुन्हा सुरू झाल्यास वाहतुकीचा खर्च कमी होऊ शकतो आणि आवश्यक वस्तूंचा वेळेत पुरवठा सुनिश्चित करता येईल. भारतातील तेलशुद्धीकरण प्रकल्प पाकिस्तानच्या भौगोलिकदृष्ट्या जवळ असल्यामुळे भारतातून पेट्रोलियम पदार्थांची आयात करणे अधिक स्वस्त आणि जलद ठरू शकते. याशिवाय भारतीय कृषी आणि औद्योगिक उत्पादनांची उपलब्धता वाढल्यास पाकिस्तानमधील उद्योगांना उत्पादन खर्च कमी करण्यास मदत होईल.
प्रादेशिक आर्थिक सहकार्याबाबत बोलताना कसुरी यांनी श्रीलंकेतील आर्थिक संकटाचा उल्लेख केला. श्रीलंका आर्थिक संकटात असताना भारताने केलेली आर्थिक मदत हे शेजारी देश कठीण काळात एकमेकांना कशा प्रकारे सहकार्य करू शकतात, याचे उदाहरण असल्याचे त्यांनी सांगितले.
पीआयबीसीने केलेला ४० अब्ज डॉलरच्या नुकसानीचा दावा हा सहा वर्षांहून अधिक काळ ठप्प असलेल्या व्यावसायिक संबंधांमुळे झालेल्या एकूण नुकसानीचा ताजा अंदाज आहे. यापूर्वी याच संघटनेने व्यक्त केलेल्या अंदाजापेक्षा ही रक्कम लक्षणीयरीत्या अधिक आहे.
