जीवन म्हणजे परीक्षा नाही, अपयशी ठरलात तरी संधी मिळेल!

कार्यक्रमामध्ये निसर्गाचे रक्षण करण्याबाबत एका विद्यार्थ्याने पश्न विचारला होता. यावर उत्तर देताना पंतप्रधान नरेंद्र मोदी म्हणाले, निसर्गाचे शोषण ही आपली संस्कृती नाही. निसर्गाचे रक्षण करेल अशी आपली जीवनशैली असली पाहिजे. परीक्षेच्या पेपरातील चुका टाळण्यासाठी काय करावे लागेल असा एका विद्यार्थ्याने प्रश्न विचारला. विद्यार्थ्याच्या प्रश्नाचे उत्तर देताना, पंतप्रधान मोदींनी विद्यार्थ्यांना मागील वर्षांचे पेपर सोडवण्यास आणि त्यांचा सराव करण्यास सांगितले.

अपयशाच्या भीतीवर मात कशी करावी यावर पंतप्रधान नरेंद्र मोदी म्हणाले की, जीवन म्हणजे परीक्षा नाही. जर तुम्ही अपयशी ठरलात तर तुम्हाला आणखी एक संधी मिळेल. अशामुळे तुमचे मानसिक आरोग्य बिघडू देवू नका. जीवन मौल्यवान आहे, परीक्षेचा निकाल नाही. पंतप्रधान मोदींनी विद्यार्थ्यांना सांगितले की आपण सतत आपले सर्वोत्तम प्रयत्न केले पाहिजेत.

हे ही वाचा : 

पंतप्रधान मोदी विद्यार्थ्यांना म्हणाले, आपण स्वतःशी स्पर्धा केली पाहिजे. जो स्वतःशी स्पर्धा करतो त्याचा विश्वास कधीही तुटत नाही. स्वतःला कधी एकटे पडू देवू नका सतत कामात रहा. एका विद्यार्थ्याच्या प्रश्नाचे उत्तर देताना पंतप्रधानांनी विद्यार्थ्यांना सांगितले की, त्यांनी त्यांच्या मनात जे काही आहे ते कोणत्याही संकोचाशिवाय बोलले पाहिजे. तसेच विद्यार्थ्यांना वर्तमानावर लक्ष केंद्रित करण्यास सांगितले. वयाचा विचार न करता लिहिण्याची सवय आणि उन्हात बसण्याची सवय लावण्याचा सल्ला त्यांनी दिला.

दरम्यान, ‘परीक्षा पे चर्चा’ कार्यक्रमाच्या माध्यमातून बोर्डाच्या परीक्षेला बसणाऱ्या विद्यार्थ्यांना संबोधित करण्यासाठी केवळ नरेंद्र मोदी यांचा सहभाग नसून यंदा वेगवेगळ्या क्षेत्रातील दिग्गज व्यक्तिमत्त्वांना सहभागी करून घेतले जाणार आहे. विद्यार्थ्यांना मार्गदर्शन करण्यासाठी पंतप्रधान नरेंद्र मोदींसोबत दीपिका पदुकोण, मेरी कोम, अवनी लेखरा, रुजुता दिवेकर, सोनाली सभरवाल, फूडफार्मर, विक्रांत मेस्सी, भूमी पेडणेकर, टेक्निकल गुरुजी आणि राधिका गुप्ता यांचाही समावेश असणार आहे. हे विविध क्षेत्रातील यशस्वी दिग्गज विद्यार्थ्यांना मार्गदर्शन करणार आहेत.