योग दिनासाठी कोलकाता सज्ज; मोदी करणार नेतृत्व

आंतरराष्ट्रीय योग दिन २०२६ निमित्त भारत पुन्हा एकदा जागतिक स्तरावर योगाचा संदेश देण्यासाठी सज्ज झाला असून २१ जून रोजी पंतप्रधान नरेंद्र मोदी कोलकात्यातील ऐतिहासिक रेड रोडवर आयोजित मुख्य राष्ट्रीय कार्यक्रमाचे नेतृत्व करणार आहेत. यंदाच्या १२ व्या आंतरराष्ट्रीय योग दिनाची थीम ‘योग फॉर हेल्दी एजिंग’ अर्थात ‘निरोगी आणि सुदृढ वृद्धत्वासाठी योग’ अशी ठेवण्यात आली आहे. या कार्यक्रमात हजारो नागरिक, योगप्रेमी, विद्यार्थी आणि विविध क्षेत्रातील मान्यवर सहभागी होणार आहेत.

आयुष मंत्रालयाने योग दिनाच्या तयारीला अंतिम स्वरूप दिले असून देशभरात आणि जगभरात मोठ्या प्रमाणावर कार्यक्रमांचे आयोजन करण्यात आले आहे. भारतीय सांस्कृतिक संबंध परिषद (ICCR) आणि भारताच्या परदेशातील २१० हून अधिक दूतावासांच्या माध्यमातून सुमारे २,५०० ठिकाणी योग दिनाचे कार्यक्रम होणार आहेत. यामुळे योगाचा जागतिक संदेश आणखी व्यापक पातळीवर पोहोचणार आहे.
हे ही वाचा:
“टेलिग्राम म्हणजे नवा डार्क वेब”

राम मंदिर देणगी प्रकरणात मोठा खुलासा

डीआर काँगोविरुद्धच्या बरोबरीनंतर रोनाल्डोचा संघाला पाठिंबा

इराणने अटी मोडल्यास पुन्हा लष्करी कारवाई

यंदाच्या योग दिनाचे विशेष आकर्षण म्हणजे भारतीय नौदलाची सहभागिता. नौदलाच्या अत्याधुनिक युद्धनौका आणि संशोधन जहाजांवर विशेष योग सत्रांचे आयोजन करण्यात येणार आहे. यामध्ये भारतीय नौदलाच्या ‘INS Dunagiri’, ‘INS Agray’ आणि संशोधन जहाज ‘Sanshodhak’ यांचा समावेश आहे. समुद्रात कार्यरत असलेल्या जवानांमध्ये शारीरिक तंदुरुस्ती, मानसिक स्थैर्य आणि एकाग्रता वाढवण्यासाठी योगाचे महत्त्व अधोरेखित करण्याचा उद्देश या उपक्रमामागे आहे.

कोलकात्यातील मुख्य कार्यक्रमाच्या पार्श्वभूमीवर शहरात विविध उपक्रम राबवले जात आहेत. १९ जून रोजी ‘दौड से ध्यान’ हा विशेष कार्यक्रम आयोजित करण्यात येणार असून शारीरिक तंदुरुस्ती आणि मानसिक आरोग्य यांच्यातील संबंध अधोरेखित केला जाईल. २० जून रोजी ‘वंदे योगम्’ आणि पश्चिम बंगाल दिनानिमित्त विविध सांस्कृतिक कार्यक्रमांचे आयोजन करण्यात येणार आहे.

योग दिनाच्या तयारीचा भाग म्हणून देशभरात शाळा, महाविद्यालये, सार्वजनिक संस्था आणि सामाजिक संघटनांमध्ये योग शिबिरे, जनजागृती मोहीम आणि सामूहिक योग सत्रे आयोजित केली जात आहेत. अलीकडेच झालेल्या देशव्यापी थेट योग सत्रात ४ लाखांहून अधिक लोकांनी एकाच वेळी सहभाग नोंदवत गिनीज वर्ल्ड रेकॉर्डही प्रस्थापित केला आहे.

संयुक्त राष्ट्रसंघाने २०१४ मध्ये भारताच्या प्रस्तावाला मान्यता देत २१ जून हा ‘आंतरराष्ट्रीय योग दिन’ म्हणून घोषित केला होता. त्यानंतर योग हा भारताच्या सांस्कृतिक वारशाचा जागतिक आरोग्य चळवळीत रूपांतरित झालेला महत्त्वाचा दुवा ठरला आहे. यंदाच्या कोलकाता कार्यक्रमातूनही ‘निरोगी आयुष्य, मानसिक संतुलन आणि सर्वांगीण आरोग्य’ हा संदेश जगभर पोहोचवण्याचा भारताचा प्रयत्न असेल.