“शांत, तीव्र आणि निर्णायक” वर्षपूर्तीपूर्वी ‘ऑपरेशन सिंदूर’च्या कारवाईचे स्मरण

- Advertisement -

भारताची लष्करी कारवाई ‘ऑपरेशन सिंदूर’च्या वर्षपूर्तीच्या आधी भारतीय सैन्यदलाने पाकिस्तानातील दहशतवादी ठिकाणांची यादी सार्वजनिक केली आहे. गेल्या वर्षीच्या लष्करी कारवाईत या ठिकाणांना लक्ष्य करण्यात आले होते. सैन्यदलाने उपग्रह छायाचित्रांसह या ठिकाणांवर झालेल्या नुकसानीची माहितीही शेअर केली असून, या ऑपरेशनची व्याप्ती स्पष्ट झाली आहे.

सैन्यदलाने जाहीर केलेल्या यादीत सात प्रमुख ठिकाणांचा समावेश आहे— कोटली अब्बास, कोटली गुलपूर, मेहमूना जोया, सैयदना बिलाल, भींबर, सवाई नाला आणि सरजल. ही सर्व ठिकाणे पाकिस्तान आणि पाकिस्तान अधिकृत काश्मीरमधील सक्रिय दहशतवादी नेटवर्कशी संबंधित असल्याचे सांगितले जाते. ही कारवाई गेल्या वर्षी ७ मे रोजी सुरू करण्यात आलेल्या ‘ऑपरेशन सिंदूर’चा भाग होती.

जम्मू-काश्मीरमधील पहलगाम येथे झालेल्या भीषण दहशतवादी हल्ल्याच्या प्रत्युत्तरात हे ऑपरेशन राबवण्यात आले होते. २२ एप्रिल २०२५ रोजी झालेल्या या हल्ल्यात २५ पर्यटकांची हत्या करण्यात आली होती. प्रत्यक्षदर्शींच्या मते, हल्लेखोरांनी लोकांची ओळख पडताळून त्यांना लक्ष्य केले होते. या हल्ल्याची जबाबदारी ‘द रेसिस्टन्स फ्रंट’ने स्वीकारली होती, जी लष्कर-ए-तैयबाशी संबंधित संघटना मानली जाते.

या हल्ल्यानंतर भारतीय सशस्त्र दलांनी पाकिस्तान आणि पाकिस्तान व्याप्त काश्मीरमधील दहशतवादी ठिकाणांवर अचूक लष्करी कारवाईची योजना आखली. या ऑपरेशनदरम्यान क्षेपणास्त्रे, ग्लाइड बॉम्ब आणि इतर अत्याधुनिक शस्त्रांचा वापर करून एकूण नऊ ठिकाणांना लक्ष्य करण्यात आले. यामध्ये बहावलपूर, मुरिदके, सियालकोट आणि मुजफ्फराबाद या भागांतील दहशतवादी प्रशिक्षण केंद्रांचा समावेश होता, जे जैश-ए-मोहम्मद, हिजबुल मुजाहिदीन आणि लष्कर-ए-तैयबा यांच्याशी संबंधित होते.

हे ही वाचा:

एकाचवेळी सर्वांचे फोन वाजले, मोबाईलवर आला अलर्ट! नेमकं प्रकरण काय?

बारावीच्या निकालात कोकण विभाग अव्वल तर मुलींची बाजी!

कलिंगड प्रकरण: घरातून गोळा केलेल्या अन्नाच्या ११ नमुन्यांमध्ये विष नाही

या कारवाईत मोठ्या संख्येने दहशतवादी ठार झाले होते. त्याच्या प्रत्युत्तरात पाकिस्तानने भारतावर हल्ले केले, मात्र भारतीय हवाई संरक्षण प्रणालीने ते हल्ले निष्फळ ठरवले. या ऑपरेशनदरम्यान भारताने पाकिस्तानच्या काही लष्करी ठिकाणांनाही लक्ष्य केले होते, ज्यामध्ये रावळपिंडीतील नूर खान एअरबेस, क्वेटातील १२वे कॉर्प्स मुख्यालय आणि खैबर पख्तूनख्वा येथील काही लष्करी तळांचा समावेश होता.