राजधानी दिल्लीतील हवेची गुणवत्ता पुन्हा एकदा गंभीर श्रेणीत पोहोचली आहे. शुक्रवारी (१३ नोव्हेंबर) सकाळी दिल्लीचा सरासरी हवा गुणवत्ता निर्देशांक (एक्यूआय) ४०२ वर नोंदवण्यात आला. शहरावर धुरक्याची दाट चादर पसरल्याने दृश्यमानतेतही मोठी घट झाली आहे. केंद्रीय प्रदूषण नियंत्रण मंडळाच्या (CPCB) आकडेवारीनुसार, दिल्लीतील ५८ हवेच्या गुणवत्ता निरीक्षण केंद्रांपैकी ३३ केंद्रांवरील एक्यूआय गंभीर श्रेणीत नोंदवण्यात आला.
दिल्लीतील अनेक भागांमध्ये प्रदूषणाची पातळी ४५० च्या पुढे गेली आहे. आयआयटी दिल्ली परिसरात सर्वाधिक ४८७ एक्यूआय नोंदवण्यात आला. तर चांदणी चौक आणि नॉर्थ कॅम्पस या दोन्ही ठिकाणी ४७६, पूसा येथे ४६८ आणि जाफरपूर येथे ४६१ एक्यूआय नोंदवण्यात आला. मथुरा रोडवर ४५५, आयटीओ आणि बुरारी क्रॉसिंग येथे प्रत्येकी ४५३, तर जवाहरलाल नेहरू विद्यापीठ परिसरात ४५१ एक्यूआय नोंदवण्यात आला.
दिवाळीनंतर दिल्लीतील प्रदूषणात सातत्याने वाढ होत आहे. काही काळ हवेच्या गुणवत्तेत सुधारणा झाल्यानंतर पुन्हा परिस्थिती बिघडली आहे. १२ नोव्हेंबर रोजी दिल्लीचा सरासरी एक्यूआय ३२३ नोंदवण्यात आला होता. मात्र, त्यानंतर अवघ्या काही तासांत प्रदूषणाची पातळी गंभीर श्रेणीत पोहोचली.
हे ही वाचा:
मुंबईत सार्वजनिक ठिकाणी फटाके फोडणाऱ्या दोघांविरोधात गुन्हा
एनव्हिडियाचे सीईओ जेन्सेन हुआंग यांचा राजीनामा
सोलापूर विमानतळावर प्रशिक्षणादरम्यान विमानाचे हार्ड लँडिंग
संभलमध्ये मशिदीच्या अनधिकृत बांधकामावर बुलडोझर
दिल्लीतील वाढत्या प्रदूषणामागे शेजारील राज्यांमध्ये होणारे पराली जाळण्याचे प्रकार हेही एक कारण मानले जात आहे. त्याचबरोबर हवामानातील प्रतिकूल परिस्थितीमुळे प्रदूषित हवा शहरातच अडकून राहत आहे. वाऱ्याचा कमी वेग आणि तापमानातील घट यामुळे प्रदूषकांचे वातावरणात पुरेसे विखुरण होत नसल्याने परिस्थिती अधिक गंभीर बनली आहे.
