कृत्रिम बुद्धिमत्ता अर्थात एआय तंत्रज्ञानाचा वाढता प्रभाव आता जागतिक रोजगार क्षेत्रासाठी मोठे आव्हान ठरत आहे. तंत्रज्ञान क्षेत्रातील नोकरकपातीचे सत्र सुरूच असून, ऑस्ट्रेलियातील लोकप्रिय ऑनलाइन डिझाइन प्लॅटफॉर्म ‘कॅन्व्हा’ने तब्बल २२ टक्के कर्मचाऱ्यांना कामावरून कमी करण्याचा निर्णय घेतला आहे. या निर्णयामुळे कंपनीतील १,२७१ कर्मचाऱ्यांच्या नोकऱ्यांवर परिणाम होणार आहे. कॅन्व्हाच्या सह-संस्थापक आणि मुख्य कार्यकारी अधिकारी मेलानी पर्किन्स यांनी कंपनीच्या संकेतस्थळावर प्रसिद्ध केलेल्या निवेदनातून ही माहिती दिली. कंपनीच्या १३ वर्षांच्या इतिहासातील हा सर्वांत कठीण निर्णय असल्याचे त्यांनी म्हटले आहे. यापूर्वी मनोरंजन क्षेत्रातील दिग्गज कंपनी डिस्नेनेही नोकरकपातीचे संकेत दिले होते. त्यामुळे जागतिक कंपन्यांमधील कर्मचारी कपातीचा मुद्दा पुन्हा चर्चेत आला आहे.
कॅन्व्हाच्या या निर्णयामागे एआय तंत्रज्ञानामुळे बदलणारे कामकाजाचे स्वरूप हे प्रमुख कारण आहे. पूर्वी ग्राफिक्स, जाहिराती, सादरीकरणे आणि डिजिटल डिझाइन तयार करण्यासाठी विशेष कौशल्य असलेल्या कर्मचाऱ्यांची आवश्यकता होती. मात्र, आता एआयच्या माध्यमातून सामान्य वापरकर्त्यांनाही कमी वेळेत आणि सहजपणे दर्जेदार डिझाइन तयार करता येत आहेत. त्यामुळे डिझाइन क्षेत्रातील पारंपरिक कामकाजाच्या पद्धती बदलत आहेत. नवीन तंत्रज्ञानामुळे लोक काय तयार करतात, ते कसे तयार करतात आणि उत्पादनांकडून त्यांच्या अपेक्षा काय आहेत, यामध्ये मोठा बदल झाल्याचे मेलानी पर्किन्स यांनी स्पष्ट केले. केवळ किरकोळ बदल करून कंपनीला पुढे जाता येणार नसल्याचेही त्यांनी नमूद केले.
हे ही वाचा:
अमेरिकेच्या मध्यावधी निवडणुकीतील ‘एम’ फॅक्टर
राजस्थानात रेल्वे रुळावर भीषण स्फोट!
ज्येष्ठ पत्रकार शेखर जोशी यांचे निधन
विनय आपटे स्मृतिदिनानिमित्त शॉर्ट फिल्म स्पर्धेचे आयोजन
दरम्यान, कंपनीने कामकाजाची कार्यक्षमता वाढवण्यासाठी अंतर्गत पुनर्रचनेचा निर्णय घेतला आहे. मोठ्या कार्यसंघांऐवजी छोट्या आणि अधिक सक्षम टीम्सच्या माध्यमातून कामकाज करण्यावर भर दिला जाणार आहे. विशेष विभागांमधील कर्मचाऱ्यांची संख्या कमी केली जाणार आहे. याशिवाय, ऑस्ट्रेलियातील सिडनी हे कंपनीच्या अनेक उत्पादन विभागांचे प्रमुख केंद्र म्हणून विकसित केले जाणार आहे. जानेवारीपासून बहुतांश हायब्रिड कर्मचाऱ्यांना आठवड्यातून दोन ते तीन दिवस कार्यालयात उपस्थित राहणे बंधनकारक करण्यात येणार आहे. प्रत्यक्ष संवाद आणि समन्वय वाढवण्याच्या दृष्टीने हा निर्णय घेण्यात आला आहे.
विशेष म्हणजे, कॅन्व्हाचा प्रवास तंत्रज्ञान क्षेत्रातील यशस्वी स्टार्टअपच्या उदाहरणांपैकी एक मानला जातो. २०१३ मध्ये मेलानी पर्किन्स, क्लिफ ओब्रेक्ट आणि कॅमेरॉन ॲडम्स यांनी या कंपनीची स्थापना केली. डिझाइन प्रक्रिया सर्वसामान्यांसाठी सोपी करणे हा कंपनीचा मुख्य उद्देश होता. २०२१ मध्ये कंपनीचे मूल्यांकन ४० अब्ज डॉलरपर्यंत पोहोचले होते. मात्र, टेक क्षेत्रातील मंदीमुळे त्यात घट होऊन ते सुमारे २६ अब्ज डॉलरवर आले. आता संभाव्य आयपीओच्या तयारीदरम्यान कंपनीला आर्थिक ताळेबंद सांभाळण्याचे आव्हान आहे. एआयमुळे उत्पादकता वाढत असली, तरी त्याच तंत्रज्ञानामुळे मोठ्या प्रमाणावर रोजगारावर परिणाम होऊ शकतो, हे कॅन्व्हाच्या निर्णयातून पुन्हा अधोरेखित झाले आहे.
