पश्चिम आशियातील भू-राजकीय तणावामुळे काही दिवस विस्कळीत झालेला देशातील कमर्शियल एलपीजी (LPG) पुरवठा आता पुन्हा पूर्ण क्षमतेने सुरू झाला आहे. केंद्र सरकारने व्यावसायिक एलपीजीवरील सर्व तात्पुरते निर्बंध हटवण्याचा निर्णय घेतला असून, संकटापूर्वी ज्या प्रमाणात पुरवठा केला जात होता त्याच पातळीवर एलपीजीची उपलब्धता पुन्हा करण्यात आली आहे. या निर्णयामुळे हॉटेल, रेस्टॉरंट, केटरिंग, अन्नप्रक्रिया उद्योग, लघुउद्योग तसेच इतर व्यावसायिक ग्राहकांना मोठा दिलासा मिळणार आहे.
पश्चिम आशियातील संघर्षामुळे होर्मुझ सामुद्रधुनीमार्गे होणाऱ्या एलपीजी आयातीवर दबाव निर्माण झाला होता. त्यामुळे देशातील घरगुती ग्राहकांना कोणताही तुटवडा जाणवू नये, यासाठी सरकारने व्यावसायिक एलपीजीच्या पुरवठ्यावर काही मर्यादा लागू केल्या होत्या. मात्र आता आंतरराष्ट्रीय परिस्थितीत सुधारणा, आयात साखळी स्थिर होणे आणि देशांतर्गत उत्पादन वाढल्याने हे सर्व निर्बंध मागे घेण्यात आले आहेत.
हे ही वाचा:
ऑस्ट्रेलिया नॉकआउट फेरीत!
सोनं पुन्हा स्वस्त! चांदीतही मोठी घसरण
राम मंदिर देणगी गैरव्यवहार प्रकरणानंतर चंपत राय यांचा राजीनामा
आत्महत्या केलेल्या तरुणीच्या बॅगमध्ये सापडला आयफोन आणि बिंग फुटले
सरकारने बल्क एलपीजीचा पुरवठाही पुन्हा सुरू केला असून, तो सध्या संकटापूर्वीच्या वापराच्या सुमारे ५० टक्के पातळीपर्यंत पुनर्संचयित करण्यात आला आहे. यामुळे मोठे उद्योग आणि व्यावसायिक वापरकर्त्यांनाही इंधनाचा नियमित पुरवठा मिळू लागणार आहे. याशिवाय, देशांतर्गत एलपीजी उत्पादन दररोज ४० हजार मेट्रिक टनांपेक्षा कमी होणार नाही, याचीही खबरदारी सरकारने घेतली आहे.
तेल विपणन कंपन्यांना व्यावसायिक ग्राहकांचा स्वतंत्र डेटाबेस तयार ठेवण्याच्या सूचना देण्यात आल्या आहेत, जेणेकरून भविष्यात अशा संकटाच्या काळात पुरवठ्याचे अधिक प्रभावी नियोजन करता येईल. तसेच ज्या व्यावसायिक ग्राहकांना पाइप्ड नॅचरल गॅस (PNG) उपलब्ध आहे, त्यांना टप्प्याटप्प्याने पीएनजीकडे वळवण्याचाही सरकारचा मानस आहे.
सरकारच्या या निर्णयामुळे देशातील लाखो व्यावसायिक एलपीजी ग्राहकांना मोठा दिलासा मिळणार असून, हॉटेल, रेस्टॉरंट, केटरिंग, उत्पादन उद्योग आणि सेवा क्षेत्रातील कामकाज अधिक सुरळीत होण्याची अपेक्षा आहे. पश्चिम आशियातील तणावानंतर ऊर्जा सुरक्षेला प्राधान्य देत सरकारने पुरवठा व्यवस्थापन यशस्वीपणे हाताळल्याचे या निर्णयातून स्पष्ट झाले आहे.
