दुर्गापूजेला अवघा एक महिना शिल्लक असताना पश्चिम बंगालमधील प्रशासनाने हॉटेल, रेस्टॉरंट आणि फूड कोर्टवर कारवाई सुरू केली आहे. या कारवाईदरम्यान अनेक ठिकाणी सडलेले, बुरशी लागलेले मांस तसेच शिळे कोळंबी मासे जप्त करण्यात आले आहेत.
कोलकात्यातील टांग्रा परिसरातील एका लोकप्रिय चिनी रेस्टॉरंटवर कोलकाता महापालिकेच्या आरोग्य विभागाने कारवाई केली. तपासणीदरम्यान सुमारे ५०० किलो जुने आणि खराब झालेले कच्चे चिकन व कोळंबी मासे जप्त करण्यात आल्याचे वृत्त आहे. काही खाद्यपदार्थांवर तारीख किंवा योग्य लेबलही नसल्याचे आढळून आले. संबंधित रेस्टॉरंटला तात्पुरते बंद करण्याचे आदेश देण्यात आले आहेत. इतर काही रेस्टॉरंटच्या तपासणीत रेफ्रिजरेटरमध्ये बुरशी लागलेले चिकन आढळल्याचा दावा करण्यात आला आहे. तपासणी पथक दिसताच काही कर्मचाऱ्यांनी खाद्यपदार्थ कचऱ्यात टाकण्याचाही प्रयत्न केल्याचे वृत्त आहे.
उत्तर २४ परगणा जिल्ह्यातील बादुरिया येथील एका प्रसिद्ध रेस्टॉरंटमधून सुमारे ४० किलो सडलेले चिकन आणि मटण जप्त करण्यात आले. संबंधित मांस फेकून देण्यासाठी वेगळे ठेवले होते, असा दावा रेस्टॉरंट व्यवस्थापनाने केला. मात्र, अन्न विभागाने हा दावा मान्य न करता संबंधित आस्थापनाला नोटीस बजावली आहे.
हे ही वाचा:
डीजेविरोधी भूमिका घेणाऱ्या विद्यानंद बापटांवर हल्ला
यासिन मलिकचे सरला भट हत्या प्रकरणाला आव्हान नाही!
कराची अंधारात! १६-२४ तासांच्या वीजकपातीने नागरिक हैराण
हवाई दलाच्या स्वदेशी शस्त्रसामर्थ्यात ‘खगांतक-243’ची भर
अन्नसुरक्षा कारवाई केवळ मांस आणि मासळीपुरती मर्यादित राहिलेली नाही. हुगळी जिल्ह्यातील एका मिठाईच्या दुकानात मिठाईला रंग देण्यासाठी होळीतील गुलालाचा वापर केल्याचा संशय अधिकाऱ्यांनी व्यक्त केला आहे. तर पूर्व मेदिनीपूर आणि दिघा परिसरातील हॉटेल आणि खाद्यपदार्थ विक्रेत्यांच्या तपासणीतही अन्नसुरक्षेशी संबंधित अनेक त्रुटी आढळल्याचे वृत्त आहे. काही ठिकाणी बिर्याणी तयार करण्यासाठी रासायनिक रंगांचा वापर होत असल्याचेही समोर आले आहे.
