तामिळनाडूतील मदुराई येथे प्रसिद्ध तनिष्क ज्वेलर्सच्या शोरूममध्ये झालेल्या कोट्यवधी रुपयांच्या चोरीप्रकरणाचा मोठा उलगडा झाला आहे. या धक्कादायक प्रकरणात मुख्य आरोपी म्हणून एका यूट्यूबरचे नाव समोर आले आहे. निशांत असे या आरोपीचे नाव असून, त्याच्याकडून पोलिसांनी ६.४ किलो सोन्याचे दागिने जप्त केले आहेत. यापूर्वी त्याची महिला साथीदार मीनाक्षी हिच्याकडून ५.५ किलो सोने हस्तगत करण्यात आले होते. त्यामुळे या प्रकरणात आतापर्यंत एकूण ११.९ किलो सोन्याचे दागिने पोलिसांच्या हाती लागले आहेत.
मदुराई बायपास रोडवरील तनिष्क शोरूममध्ये १२ नोव्हेंबर रोजी पहाटे ही चोरी झाली होती. चोरट्यांनी शोरूमला लक्ष्य करत मोठ्या प्रमाणात सोन्याचे दागिने लंपास केले होते. घटनेनंतर पोलिसांनी तपासाची चक्रे वेगाने फिरवली. तपासादरम्यान मुख्य आरोपी निशांतचा शोध घेत असताना त्याला धर्मपुरी जिल्ह्यातील सेशमपट्टी परिसरातून अटक करण्यात आली. त्यानंतर त्याला मदुराई येथे आणून पोलिसांनी कसून चौकशी केली. या चौकशीत चोरीच्या दागिन्यांबाबत महत्त्वाची माहिती समोर आली.
हे ही वाचा:
डॉलरच्या तुलनेत रुपयाची दमदार उसळी
भारतीय स्टील निर्यातीला युरोपियन युनियनच्या अँटिडम्पिंग शुल्काचा फटका
चीनच्या एआय कंपनी झिपूच्या शेअरमध्ये ८५ टक्क्यांची घसरण
मायक्रोसॉफ्टनंतर अमेरिकेतील बँका आणि विमानसेवा विस्कळीत
निशांतने चोरीचे दागिने मुनियांडीपुरम येथील गोपालिपुरमच्या डोंगराळ भागात लपवून ठेवल्याची कबुली दिली. त्यानुसार पोलिसांनी संबंधित परिसरात शोधमोहीम राबवली. या कारवाईत तब्बल ६.४ किलो सोन्याचे दागिने जप्त करण्यात आले. याआधी या प्रकरणातील सहआरोपी मीनाक्षी हिच्याकडून ५.५ किलो सोने जप्त करण्यात आले होते. त्यामुळे चोरीच्या प्रकरणातील मोठा मुद्देमाल पोलिसांना परत मिळवण्यात यश आले आहे. या चोरीमागे आणखी कोणाचा सहभाग आहे का, याचाही तपास सुरू आहे.
दरम्यान, पोलिसांनी निशांतची वैद्यकीय तपासणी करून त्याला १६ नोव्हेंबर रोजी न्यायालयात हजर केले. न्यायालयाने त्याला १ डिसेंबरपर्यंत न्यायालयीन कोठडी सुनावली असून, सध्या त्याची रवानगी मदुराई मध्यवर्ती कारागृहात करण्यात आली आहे. विशेष म्हणजे, कोट्यवधी रुपयांच्या या चोरीत एका यूट्यूबरचा सहभाग समोर आल्याने परिसरात खळबळ उडाली आहे. पोलिसांकडून या संपूर्ण कटाचा आणि चोरीतील उर्वरित मुद्देमालाचा तपास सुरू आहे.
