घरस्पोर्ट्समहेंद्रसिंह धोनीचा आयपीएलला अलविदा

महेंद्रसिंह धोनीचा आयपीएलला अलविदा

आता चेन्नई सुपर किंग्सचा मेंटॉर

क्रिकेट चाहत्यांचा लाडका आणि चेन्नई सुपर किंग्सचा आधारस्तंभ महेंद्रसिंह धोनी याने आयपीएलमध्ये खेळाडू म्हणून निवृत्ती घेतली आहे. चेन्नई सुपर किंग्सने १७ नोव्हेंबर रोजी याबाबत घोषणा केली. मात्र, धोनीचे चेन्नईशी असलेले नाते कायम राहणार असून, आगामी आयपीएल २०२७ च्या हंगामात तो संघाच्या मेंटॉरच्या भूमिकेत दिसणार आहे. त्यामुळे मैदानावर हेलिकॉप्टर शॉट मारणारा आणि आपल्या नेतृत्वाने सामन्याचे चित्र बदलणारा धोनी आता मैदानाबाहेरून संघाला मार्गदर्शन करणार आहे.

२००८ मध्ये आयपीएलच्या पहिल्या हंगामापासून धोनीचा चेन्नई सुपर किंग्ससोबतचा प्रवास सुरू झाला. या प्रवासात त्याने संघाला पाच वेळा आयपीएलचे विजेतेपद मिळवून दिले. २०१०, २०११, २०१८, २०२१ आणि २०२३ मध्ये चेन्नईने धोनीच्या नेतृत्वाखाली जेतेपद पटकावले. त्याच्या नेतृत्वशैलीमुळे चेन्नई सुपर किंग्स हा आयपीएलमधील सर्वाधिक लोकप्रिय आणि यशस्वी संघ बनला. अनेक युवा खेळाडूंना संधी देत त्यांना मोठे व्यासपीठ उपलब्ध करून देण्यातही धोनीची महत्त्वाची भूमिका राहिली आहे.
हे ही वाचा:
डॉलरच्या तुलनेत रुपयाची दमदार उसळी

भारतीय स्टील निर्यातीला युरोपियन युनियनच्या अँटिडम्पिंग शुल्काचा फटका

चीनच्या एआय कंपनी झिपूच्या शेअरमध्ये ८५ टक्क्यांची घसरण

मायक्रोसॉफ्टनंतर अमेरिकेतील बँका आणि विमानसेवा विस्कळीत

धोनीच्या निवृत्तीमागे वाढते वय आणि दुखापती ही प्रमुख कारणे मानली जात आहेत. २०२५ च्या हंगामात त्याने १४ सामने खेळले होते, तर २०२६ च्या हंगामात पायाच्या पोटरीच्या दुखापतीमुळे त्याला मैदानापासून दूर राहावे लागले. आपल्या आयपीएल कारकिर्दीत धोनीने २७८ सामने खेळताना ५ हजार ४३९ धावा केल्या आहेत. याशिवाय, कर्णधार म्हणून २२६ सामन्यांमध्ये संघाचे नेतृत्व केले आहे. त्यामुळे आयपीएलच्या इतिहासातील महान खेळाडू आणि कर्णधार म्हणून त्याचे नाव कायम स्मरणात राहणार आहे.

दरम्यान, मेंटॉर म्हणून धोनीची नवी भूमिका चेन्नईसाठी महत्त्वाची ठरणार आहे. नव्या खेळाडूंना घडवणे, संघाची रणनीती आखणे आणि मैदानावरील दबावाच्या परिस्थितीत योग्य निर्णय घेण्यासाठी त्याचा अनुभव उपयोगी पडणार आहे. खेळाडू म्हणून धोनीचा प्रवास संपला असला, तरी चेन्नईच्या पिवळ्या जर्सीशी असलेले त्याचे नाते कायम राहणार आहे. त्यामुळे चाहत्यांना आता धोनीची फलंदाजी पाहता येणार नसली, तरी त्याचे मार्गदर्शन संघासाठी किती प्रभावी ठरते, याकडे संपूर्ण क्रिकेटविश्वाचे लक्ष असेल.

प्रतिक्रिया द्या

कृपया आपली टिप्पणी द्या!
कृपया येथे आपले नाव प्रविष्ट करा

The reCAPTCHA verification period has expired. Please reload the page.

Exit mobile version