भारताचे पंतप्रधान नरेंद्र मोदी यांनी नेपाळच्या अंतरिम सरकारच्या पंतप्रधान सुशीला कार्की यांच्याशी फोनवरून संवाद साधला. नेपाळच्या जनरल झेड चळवळीदरम्यान झालेल्या जीवित आणि मालमत्तेच्या नुकसानाबद्दल नरेंद्र मोदी यांनी शोक व्यक्त केला. पंतप्रधान मोदी यांनी यासंबंधी एक्सवर पोस्ट करून कळवले आहे.
पंतप्रधान मोदींनी एक्सवर म्हटले आहे की, “नेपाळच्या अंतरिम सरकारच्या पंतप्रधान श्रीमती सुशीला कार्की यांच्याशी चर्चा झाली. अलिकडच्या काळात झालेल्या दुःखद जीवितहानीबद्दल मनापासून शोक व्यक्त केला. शांतता आणि स्थैर्य पुनर्संचयित करण्याच्या प्रयत्नांना भारताचा दृढ पाठिंबा असल्याचे पुन्हा सांगितले. उद्या (१९ सप्टेंबर) त्यांना आणि नेपाळच्या लोकांना त्यांच्या राष्ट्रीय दिनानिमित्त मी माझ्या हार्दिक शुभेच्छा देतो,” असे मोदींनी म्हटले आहे.
नेपाळच्या माजी मुख्य न्यायाधीश सुशीला कार्की यांनी देशाच्या अंतरिम पंतप्रधान म्हणून शपथ घेतली. त्या नेपाळमध्ये सर्वोच्च पदावर विराजमान होणाऱ्या पहिल्या महिला ठरल्या. काठमांडू येथील राष्ट्रपती निवासस्थान शीतल निवास येथे झालेल्या औपचारिक समारंभात राष्ट्रपती रामचंद्र पौडेल यांनी त्यांना पदाची शपथ दिली. कार्की यांची नियुक्ती माजी पंतप्रधान केपी शर्मा ओली यांच्या राजीनाम्यानंतर झाली आहे. जनरल झेड कार्यकर्त्यांच्या नेतृत्वाखालील देशव्यापी चळवळीच्या वाढत्या दबावानंतर या आठवड्याच्या सुरुवातीला त्यांनी राजीनामा दिला होता. कार्की यांचे ध्येय सुव्यवस्था पुनर्संचयित करणे, निवडणुका घेणे आणि नेपाळचा विकास सुनिश्चित करणे आहे.
हेही वाचा..
ढगफुटीने हाहाकार, परिस्थिती गंभीर
गृहमंत्री अमित शाह यांची मुख्यमंत्री नीतीश कुमार यांच्याशी भेट
लेबनॉनमध्ये इस्रायलचा मोठा घाव: आयडीएफकडून हुसेन सैफो शरीफ ठार!
दरम्यान, नेपाळच्या अंतरिम मंत्रिमंडळाचाही सोमवारी विस्तार झाला. तीन नव्या मंत्र्यांनी काठमांडूमधील राष्ट्रपती भवनातील सितल निवास येथे आपल्या पदाची शपथ घेतली. नेपाळ विद्युत प्राधिकरणाचे माजी कार्यकारी संचालक कुलमन घिसिंग यांची ऊर्जा, शहरी विकास आणि भौतिक पायाभूत सुविधा मंत्रालयाच्या प्रमुखपदी नियुक्ती करण्यात आली. प्रसिद्ध वकील ओम प्रकाश अर्याल हे कायदा आणि गृह मंत्रालयाचा कार्यभार पाहतील, तर नेपाळचे माजी वित्त सचिव रामेश्वर खनाल हे वित्त मंत्रालयाचे पर्यवेक्षण करतील.
