अमेरिकेतील फ्लोरिडामध्ये खासगी व्यावसायिक जेटचा भीषण अपघात झाला असून, या दुर्घटनेत विमानातील सर्व नऊ जणांचा मृत्यू झाला. अपघातापूर्वी वैमानिकांनी हवाई वाहतूक नियंत्रण कक्षाला वारंवार ‘मे डे, मे डे’ असा आपत्कालीन संदेश दिल्याचे शेवटच्या ध्वनिमुद्रणातून समोर आले आहे.
लिअरजेट-६० हे विमान टेक्सासमधील ऑस्टिन येथून बहामासमधील नॉर्थ एल्यूथेराकडे जात होते. मात्र फ्लोरिडातील पाम बीच काउंटीतील निवासी परिसरात विमान अचानक नियंत्रणाबाहेर गेले आणि जमिनीवर आदळून भीषण स्फोट झाला. अपघातात विमानातील सर्वांचा मृत्यू झाला असून, जमिनीवरील जीवितहानी झाल्याचे अद्याप वृत्त नाही.
अपघातापूर्वीच्या हवाई वाहतूक नियंत्रण कक्षाच्या ध्वनिमुद्रणात वैमानिकांनी विमानाला मध्यम स्वरूपाचा हवेचा तीव्र धक्का आणि बर्फ साचण्याची समस्या निर्माण झाल्याचे सांगितले होते. सुरुवातीला अधिक स्थिर हवामानासाठी विमानाची उंची बदलण्याचा प्रयत्न करण्यात आला. मात्र काही वेळातच परिस्थिती झपाट्याने बिघडली. वैमानिकांनी हवाई वाहतूक नियंत्रण कक्षाला विमान वेगाने खाली येत असल्याची माहिती देत ‘मे डे, मे डे’ असा आपत्कालीन कॉल केला. त्यानंतर विमानाची खाली उतरण्याची गती प्रति मिनिट हजारो फूटांपर्यंत वाढल्याचे त्यांनी सांगितले. परिस्थिती हाताबाहेर गेल्यानंतर वैमानिकांनी विमान जमिनीवर आदळणार असल्याची भीती व्यक्त केली. शेवटच्या क्षणी “आता वेळ संपली आहे” असा संदेश ऐकू आल्यानंतर संपर्क तुटला आणि काही क्षणांतच विमान कोसळले.
हे ही वाचा:
ममता म्हणतात, जे काफिर ते घाबरतात!
रामलीलाचा ४० टक्के भाग रिकामा, होते कुठे १० लाख लोक?
नागपुरात लॉरेन्स बिष्णोई टोळीच्या नावाने १२ सराफांना धमकी
यूपीआयचा ऐतिहासिक विक्रम! ऑक्टोबरमध्ये दररोज एक लाख कोटींचे व्यवहार
अपघातानंतर विमान जमिनीवर आदळताच मोठा स्फोट झाला आणि परिसरात आगीचे लोट पसरले. धडकेमुळे जमिनीत मोठा खड्डा पडला असून, परिसरातील रहिवाशांना सुरक्षितस्थळी हलवण्यात आले. सुमारे ६०० रहिवाशांना खबरदारीचा उपाय म्हणून स्थलांतरित करण्यात आल्याचे वृत्त आहे. दरम्यान, या भीषण दुर्घटनेचे नेमके कारण अद्याप स्पष्ट झालेले नाही.
