महिला टी-२० क्रिकेटमध्ये अवघ्या १४ चेंडूंत अर्धशतक झळकावत विश्वविक्रम करणाऱ्या प्रेमा रावत हिलाच आपण विश्वविक्रम केला आहे, याची कल्पना नव्हती. सामन्यानंतर पुरस्कार वितरण सोहळ्यादरम्यान पंचांनी ही माहिती दिल्यानंतर तिला आपल्या विक्रमाची जाणीव झाली. विशेष म्हणजे, या ऐतिहासिक कामगिरीचा आनंद तिने चित्रपटगृहात जाऊन रजनीकांत यांचा ‘जेलर २’ चित्रपट पाहत साजरा केला.
पुण्यात सुरू असलेल्या वरिष्ठ महिला टी-२० करंडक स्पर्धेत उत्तराखंडकडून खेळताना प्रेमा रावतने हैदराबादविरुद्ध अवघ्या १४ चेंडूंत अर्धशतक पूर्ण केले. तिच्या या वादळी खेळीत ६ चौकार आणि ४ षटकारांचा समावेश होता. महिला टी-२० क्रिकेटमधील हे सर्वात वेगवान अर्धशतक ठरले.
सामन्यानंतर आयएएनएसशी बोलताना प्रेमा म्हणाली, की फलंदाजी करताना तिच्या मनात कोणताही मोठा विक्रम करण्याचा विचार नव्हता. ती परिस्थितीनुसार खेळत होती. प्रत्येक चेंडूवर लक्ष केंद्रित करून संघासाठी जास्तीत जास्त धावा करण्याचा तिचा प्रयत्न होता. पंचांनी पुरस्कार वितरणावेळी १४ चेंडूंत अर्धशतक हा विश्वविक्रम असल्याचे सांगितले. त्यानंतर संघातील खेळाडू आणि प्रशिक्षकांनाही या विक्रमाची माहिती मिळाली.
राघवीसोबतच्या भागीदारीमुळे मोठी धावसंख्या उभारता आल्याचेही प्रेमाने सांगितले. राघवीच्या खेळीचे तिने विशेष आभार मानले. फलंदाजी संपल्यानंतर गोलंदाजीवर लक्ष केंद्रित करणेही तिने महत्त्वाचे मानले.
प्रेमा रावतने २०२६ च्या टी-२० विश्वचषकात भारताचे प्रतिनिधित्व केले होते. दुखापतग्रस्त श्रेयांका पाटीलच्या जागी तिला भारतीय संघात संधी मिळाली होती. आशिया चषकात पाकिस्तानविरुद्ध दुबई येथे ९ धावांत ३ बळी मिळवण्याची कामगिरी तिच्यासाठी विशेष ठरली.
महिला प्रीमियर लीग २०२६ चे विजेतेपद पटकावणाऱ्या रॉयल चॅलेंजर्स बंगळुरू संघाचाही ती भाग होती. आगामी हंगामासाठी आरसीबीने तिला संघात कायम ठेवले आहे. या संघात खेळल्यामुळे आत्मविश्वास वाढला आणि अनुभवी खेळाडूंकडून बरेच काही शिकायला मिळाल्याचे तिने सांगितले.
