भारतीय वायुसेनेचे प्रमुख एअर चीफ मार्शल एपी सिंह यांनी मंगळवार, २० ऑक्टोबर रोजी भारतीय वायुसेनेच्या विमानातून आपल्या कारकिर्दीतील शेवटचे उड्डाण केले. विशेष म्हणजे, या ऐतिहासिक क्षणी त्यांच्यासोबत त्यांचे पहिले उड्डाण प्रशिक्षक, निवृत्त विंग कमांडर व्ही. एस. कोचर हेही उपस्थित होते. एपी सिंह यांनी एचजेटी-१६ किरण एमके-१ या प्रशिक्षण विमानातून ५५ मिनिटे आकाशात उड्डाण केले. चार दशकांहून अधिक काळ चाललेल्या त्यांच्या उड्डाण प्रवासातील हा क्षण भावूक आणि संस्मरणीय ठरला.
एपी सिंह यांनी २८ जानेवारी १९८४ रोजी पहिल्यांदा विमान उडवले होते. त्यानंतर चार दशकांहून अधिक काळ त्यांनी भारतीय वायुसेनेत वैमानिक म्हणून सेवा बजावली. आता त्यांच्या उड्डाण कारकिर्दीचा महत्त्वाचा अध्याय संपताना त्यांनी प्रशिक्षणासाठी वापरल्या जाणाऱ्या किरण एमके-१ या विमानाची निवड केली. या उड्डाणाचे सर्वात खास वैशिष्ट्य म्हणजे त्यांचे पहिले उड्डाण प्रशिक्षक व्ही. एस. कोचर यांची उपस्थिती. वैमानिक म्हणून सुरुवातीच्या काळात एपी सिंह यांना उड्डाणाचे धडे देणारे कोचर हे त्यांच्या कारकिर्दीतील या महत्त्वाच्या क्षणाचे साक्षीदार ठरले.
एचजेटी-१६ किरण एमके-१ हे भारतीय वायुसेनेतील वैमानिकांना प्रशिक्षण देणाऱ्या महत्त्वाच्या विमानांपैकी एक आहे. अनेक पिढ्यांतील वैमानिकांना उड्डाणाचे प्राथमिक आणि प्रगत धडे देण्यात या विमानाने महत्त्वाची भूमिका बजावली आहे. त्यामुळे एपी सिंह यांनी आपल्या उड्डाण कारकिर्दीतील शेवटच्या भरारीसाठी याच विमानाची निवड करणे विशेष मानले जात आहे.
हे ही वाचा:
सलग तिसऱ्या दिवशी मुंबईच्या हवेचा दर्जा घसरला
‘कॉक्रोच’चे भाऊ सापडले आईही सापडली आता बापाचा शोध |
‘स्कूल ठीक करो’ अभियानामुळे फ्रान्समध्ये पेटला वणवा… |
३१ ऑक्टोबरला नवे वायुसेना प्रमुख पदभार स्वीकारणार
एअर चीफ मार्शल एपी सिंह यांचा निवृत्तीचा काळ जवळ आला आहे. केंद्र सरकारने एअर मार्शल आशुतोष दीक्षित यांची भारतीय वायुसेनेच्या पुढील प्रमुखपदी नियुक्ती केली आहे. सध्या ते वायुसेनेचे उपप्रमुख म्हणून कार्यरत आहेत. ते ३१ ऑक्टोबर रोजी वायुसेनाप्रमुख पदाची सूत्रे स्वीकारणार आहेत.
