पंतप्रधान नरेंद्र मोदी यांच्या हस्ते मंगळवारी (३ नोव्हेंबर) शिवाजीनगर ते हिंजवडी या पुणे मेट्रोच्या पिंक लाइनचे लोकार्पण करण्यात आले. या कार्यक्रमाला मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि सुनेत्रा पवार उपस्थित होते. पंतप्रधान मोदी यांनी ऑनलाइन माध्यमातून कार्यक्रमात सहभाग घेत पुणेकरांना संबोधित केले. मेट्रोच्या नव्या मार्गामुळे शहराच्या विकासाला गती मिळेल, असा विश्वास त्यांनी व्यक्त केला.
“दहा वर्षांपूर्वी पुणे मेट्रोच्या पहिल्या टप्प्याच्या कामाचे भूमिपूजन करण्याची संधी मला मिळाली होती. आता हिंजवडी ते शिवाजीनगरदरम्यान मेट्रो सुरू झाल्याने पुण्यातील मोठ्या आयटी हबला अधिक चांगली कनेक्टिव्हिटी मिळणार आहे. नव्या मार्गामुळे शहरातील जुन्या आणि नव्या भागांमधील संपर्कव्यवस्था आणखी मजबूत होईल,” असे पंतप्रधान मोदी म्हणाले.
पुणे हे आयटी, ऑटोमोबाईल, औषधनिर्मिती, स्टार्टअप्स आणि उत्पादन क्षेत्रातील महत्त्वाचे केंद्र आहे. त्यामुळे मेट्रो कनेक्टिव्हिटी वाढल्याने शहराच्या विकासाला चालना मिळेल, असे त्यांनी नमूद केले. शहराची ओळख आता केवळ उद्योग किंवा खाद्यसंस्कृतीवरून ठरत नाही, तर ते किती स्पर्धात्मक आहे आणि नागरिकांचे जीवनमान किती सुलभ आहे, यावरही ठरते. मेट्रोमुळे या दोन्ही निकषांमध्ये सुधारणा होते, असे त्यांनी सांगितले.
हे ही वाचा:
दिया मिर्झाचा व्हिडीओ पुन्हा अपलोड करा!
मंदिरांत पुजारी बलात्कार करतात…नेहा बोराने विष ओकले
माउंट एव्हरेस्ट परिसरात दोन हेलिकॉप्टरची धडक
मुकेश अंबानी पुन्हा आशियातील सर्वात श्रीमंत व्यक्ती
मेट्रोमुळे प्रवासाचा वेळ वाचतो, उत्पादकता वाढते आणि त्याचा फायदा देशाच्या अर्थव्यवस्थेला होतो. या आर्थिक विकासाचा लाभ गरीब आणि मध्यमवर्गीयांनाही मिळतो, असे पंतप्रधान मोदी म्हणाले. २०१४ पर्यंत देशातील केवळ पाच शहरांमध्ये मेट्रो सेवा सुरू होती. मात्र, गेल्या १२ वर्षांत मेट्रो नेटवर्कचा मोठ्या प्रमाणात विस्तार झाला आहे. आज भारताचे मेट्रो नेटवर्क जगातील पहिल्या तीन नेटवर्कमध्ये गणले जाते. विकसित भारताच्या निर्मितीसाठी रस्ते, महामार्ग, द्रुतगती मार्ग, रेल्वे मार्गांचे विद्युतीकरण, बोगदे आणि पुलांसारख्या पायाभूत सुविधा प्रकल्पांवरही वेगाने काम सुरू असल्याचे पंतप्रधानांनी सांगितले.
