बांगलादेशात पुन्हा हिंसाचार आणि जाळपोळीच्या घटना समोर आल्या आहेत. माजी पंतप्रधान शेख हसीना यांच्या अवामी लीग पक्षाच्या समर्थकांवर गोपालगंज सदर पोलीस ठाण्याला आग लावल्याचा आरोप आहे. गोपालगंज हे शेख हसीना यांचे मूळ गाव आहे. याशिवाय, परिसरातील बांगलादेश नॅशनलिस्ट पार्टी (बीएनपी)चे विद्यमान खासदार एस.एम. जिलानी यांच्या निवासस्थानालाही आग लावण्यात आली आहे.
मिळालेल्या माहितीनुसार, राजधानी ढाका येथील विविध भागांतही जाळपोळीच्या घटना घडल्या आहेत. येथे अनेक बस पेटवून देण्यात आल्या. तसेच, अवामी लीगच्या माजी सरकारमध्ये मुक्तिसंग्राम मंत्री राहिलेले ए.के.एम. मोझम्मेल हक यांच्या घरालाही आग लावल्याचे वृत्त आहे. या घटनांनंतर बांगलादेशातील राजकीय तणाव आणि सुरक्षा व्यवस्थेबाबत चिंता वाढली आहे.
हे ही वाचा:
ब्रह्मोसनंतर आता आकाश, पिनाकाच्या खरेदीत फिलिपाइन्सला स्वारस्य
सावरकरांच्या केलेल्या अपमानावरून शिवसेनेने सोनियांचे पुस्तक फाडले
जावेद अख्तर म्हणतात, प्रत्येक भारतीयाच्या रक्तात राम
बांगलादेशातील गोपालगंज येथे हिंसाचाराचे व्हिडिओ समाजमाध्यमांवर व्हायरल होत आहेत. बांगलादेश नॅशनलिस्ट पार्टीच्या (बीएनपी) खासदाराच्या घराला आग लावण्यात आली असून, त्यांचे संपूर्ण घर आगीच्या भक्ष्यस्थानी पडल्याचे व्हिडिओमध्ये दिसत आहे. यापूर्वीही गोपालगंज येथे अवामी लीगच्या सभेवर बंदी घातल्यानंतर हिंसाचार आणि जाळपोळीच्या घटना घडल्या होत्या. परिस्थिती बिघडल्यानंतर प्रशासनाने जिल्ह्याचे उपायुक्त (डीसी) आणि पोलीस अधीक्षक (एसपी) यांची बदली केली होती. ऑगस्ट २०२४ मध्ये विद्यार्थ्यांच्या नेतृत्वाखाली झालेल्या व्यापक आंदोलनांनंतर अवामी लीग सरकार कोसळले. त्यानंतर शेख हसीना यांनी बांगलादेश सोडून भारतात आश्रय घेतला. तेव्हापासून त्या भारतात वास्तव्यास आहेत.
