पंतप्रधान नरेंद्र मोदी सोमवारी फिलिपिन्सची राजधानी मनिला येथे दाखल झाले. २३ व्या आसियान-भारत शिखर परिषद आणि २१ व्या पूर्व आशिया शिखर परिषदेत सहभागी होण्यासाठी मोदी दोन दिवसांच्या फिलिपिन्स दौऱ्यावर आहेत. या परिषदांमध्ये भारत आणि आग्नेय आशियाई देशांमधील व्यापार, गुंतवणूक, सागरी सुरक्षा आणि प्रादेशिक सहकार्य यावर चर्चा होणार आहे.
फिलिपिन्सचे राष्ट्राध्यक्ष फर्डिनांड मार्कोस ज्युनियर यांच्या निमंत्रणावरून मोदी यांचा हा दौरा होत आहे. सोमवारी संध्याकाळी राष्ट्राध्यक्ष मार्कोस ज्युनियर यांच्याकडून आयोजित स्वागत समारंभ आणि रात्रीच्या भोजनाला मोदी उपस्थित राहणार आहेत. मंगळवारी १७ नोव्हेंबर रोजी ते आसियान-भारत शिखर परिषद आणि पूर्व आशिया शिखर परिषदेत सहभागी होतील. या दौऱ्यात अन्य देशांच्या प्रमुखांशी द्विपक्षीय बैठका होण्याचीही शक्यता आहे.
सागरी सुरक्षा आणि व्यापारावर लक्ष
भारताच्या ‘ऍक्ट ईस्ट’ धोरणात आसियान देशांना महत्त्वाचे स्थान आहे. त्यामुळे या दौऱ्यात इंडो-पॅसिफिक क्षेत्रातील सागरी सुरक्षा, प्रादेशिक स्थैर्य आणि संरक्षण सहकार्यावर विशेष भर असेल. दक्षिण चीन समुद्रातील परिस्थिती आणि आसियान-चीन आचारसंहितेबाबतच्या चर्चाही महत्त्वाच्या ठरण्याची शक्यता आहे.
आर्थिक संबंध मजबूत करणे हाही या दौऱ्याचा महत्त्वाचा उद्देश आहे. भारत आणि आसियान यांच्यातील वस्तू व्यापार कराराच्या (AITIGA) पुनरावलोकनावर चर्चा होणार असून, या करारातील वाटाघाटी लवकर पूर्ण करण्यावर भारताचा भर आहे. व्यापार आणि गुंतवणुकीबरोबरच डिजिटल तंत्रज्ञान, संपर्क व्यवस्था आणि पुरवठा साखळीतील सहकार्य वाढवण्यावरही चर्चा अपेक्षित आहे.
हे ही वाचा:
कुलगाममध्ये लष्करच्या मोस्ट वाँटेड दहशतवाद्यासह तिघांचा खात्मा
बिल्किस बानो प्रकरणातील दोन दोषींच्या जन्मठेपेला स्थगिती; जामीन मंजूर
जे. पी. नड्डांच्या ताफ्यावरील हल्ल्याप्रकरणी तृणमूलचा नेता अटकेत
भारत- इजिप्तमध्ये वाहतूक, पुरवठा, पायाभूत सुविधांच्या क्षेत्रात संधी
२०२६ हे वर्ष भारत-आसियान सागरी सहकार्य वर्ष म्हणून साजरे केले जात आहे. भारत आणि आसियान यांच्यातील संबंधांना २०२२ मध्ये सर्वसमावेशक सामरिक भागीदारीचा दर्जा देण्यात आला होता. या पार्श्वभूमीवर मोदी यांचा दौरा दोन्ही बाजूंमधील सहकार्याला पुढील दिशा देणारा ठरणार आहे.
