२००२ मधील गुजरात दंगलीदरम्यान बिल्किस बानो यांच्यावर झालेल्या सामूहिक बलात्कार आणि त्यांच्या कुटुंबातील सात जणांच्या हत्येप्रकरणी जन्मठेपेची शिक्षा भोगत असलेल्या दोन दोषींना सर्वोच्च न्यायालयाने जामीन मंजूर केला आहे. बिपिनचंद्र कनैयालाल जोशी आणि प्रदीप रामलाल मोढिया अशी या दोघांची नावे आहेत. न्यायालयाने त्यांच्या जन्मठेपेच्या शिक्षेला स्थगिती देत जामिनावर मुक्त करण्याचे आदेश दिले आहेत.
न्यायमूर्ती एम. एम. सुंदरेश आणि न्यायमूर्ती प्रसन्ना बी. वराळे यांच्या खंडपीठाने २८ ऑक्टोबर रोजी हा आदेश दिला. दोन्ही दोषी १७ वर्षांहून अधिक काळ तुरुंगात आहेत. त्यापैकी जोशी याला गंभीर अपंगत्व असल्याची बाबही न्यायालयाने विचारात घेतली. त्याच्या अपीलमध्ये तथ्य आणि कायद्याशी संबंधित काही मुद्द्यांवर सुनावणी होणे बाकी असल्याचे न्यायालयाने नमूद केले.
या दोघांनी मुंबई उच्च न्यायालयाच्या २०१७ मधील निर्णयाला सर्वोच्च न्यायालयात आव्हान दिले होते. उच्च न्यायालयाने त्यांची दोषसिद्धी आणि जन्मठेपेची शिक्षा कायम ठेवली होती. बचाव पक्षाने युक्तिवाद करताना, दोघांपैकी एकाचे नाव सुरुवातीच्या एफआयआरमध्ये नव्हते आणि घटनेनंतर जवळपास तीन वर्षांनी त्याला या प्रकरणात गोवण्यात आल्याचा दावा केला. मात्र, सरकारी पक्षाने गुन्ह्याचे गांभीर्य आणि कनिष्ठ न्यायालयांनी दिलेले निष्कर्ष लक्षात घेऊन जामिनाला विरोध केला.
हे ही वाचा:
जे. पी. नड्डांच्या ताफ्यावरील हल्ल्याप्रकरणी तृणमूलचा नेता अटकेत
भारत- इजिप्तमध्ये वाहतूक, पुरवठा, पायाभूत सुविधांच्या क्षेत्रात संधी
‘ऑपरेशन सिंदूर’मधून स्वदेशी शस्त्रांची ताकद सिद्ध!
२०२७मध्ये भारताचा विकासदर चीनपेक्षा वरचढ
२०२४ मध्ये शिक्षा माफीचा निर्णय रद्द
या दोघांचा समावेश बिल्किस बानो प्रकरणातील ११ दोषींमध्ये आहे. गुजरात सरकारने ऑगस्ट २०२२ मध्ये या दोषींची शिक्षा माफ करून त्यांची सुटका केली होती. मात्र, जानेवारी २०२४ मध्ये सर्वोच्च न्यायालयाने हा निर्णय रद्द केला. त्यानंतर सर्व दोषींना पुन्हा तुरुंगात जावे लागले.
