पाकिस्तानचे लष्करप्रमुख फील्ड मार्शल असीम मुनीर यांनी हिंदू आणि ज्यू समुदायांमधील वाढत्या संबंधांबाबत चिंता व्यक्त केल्याचा दावा इराणचे वरिष्ठ सुरक्षा अधिकारी मोहसेन रजाई यांनी केला आहे. हिंदू आणि ज्यू यांच्यात मुस्लिम आणि पाकिस्तानविरोधात एक प्रकारची आघाडी तयार होत असल्याचे मुनीर यांनी म्हटल्याचा दावा करण्यात आला आहे. २६ ऑक्टोबर रोजी तेहरान येथे झालेल्या चार देशांच्या सुरक्षा बैठकीदरम्यान हे वक्तव्य करण्यात आल्याचे सांगितले जात आहे. इराणच्या सरकारी दूरचित्रवाणीला दिलेल्या मुलाखतीत रजाई यांनी हा दावा केला असून, त्यासंदर्भातील व्हिडिओ सोशल मीडियावर चर्चेत आला आहे.
मात्र, असीम मुनीर यांनी प्रत्यक्षात असे वक्तव्य केल्याची स्वतंत्र पुष्टी झालेली नाही. हा दावा इराणच्या सुरक्षा अधिकाऱ्यांनी दिलेल्या माहितीनुसार समोर आला आहे.
पाकिस्तानमधील लाहोरस्थित २४ न्यूज एचडी या वृत्तवाहिनीने इराणच्या सरकारी प्रसारक आयआरआयबीला मोहसेन रजाई यांनी दिलेल्या मुलाखतीचा हवाला देत हे वृत्त दिले आहे. २६ ऑक्टोबर रोजी तेहरानमध्ये इराण, पाकिस्तान, सौदी अरेबिया आणि तुर्कस्तान या चार देशांची सुरक्षा बैठक झाली होती. इस्रायल आणि अमेरिकेशी संबंधित वाढत्या प्रादेशिक तणावाच्या पार्श्वभूमीवर ही बैठक आयोजित करण्यात आली होती.
या बैठकीत पाकिस्तानचे प्रतिनिधित्व लष्करप्रमुख असीम मुनीर यांनी केले. तुर्कस्तानच्या वतीने गुप्तचर प्रमुख इब्राहिम कालिन उपस्थित होते. सौदी अरेबियाचे प्रतिनिधित्व संरक्षणमंत्री प्रिन्स खालिद बिन सलमान यांनी केले, तर इराणच्या वतीने वरिष्ठ सुरक्षा अधिकारी मोहसेन रजाई सहभागी झाले होते.
हे ही वाचा:
बीएसएफ जवानांवरील हल्ल्याप्रकरणी नऊ जणांना अटक
अमेरिका-इराण संघर्षाचा तेल बाजाराला फटका
भारताचा मॅन्युफॅक्चरिंग पीएमआय ५४.७ अंकांवर
मंदिरांत पुजारी बलात्कार करतात…नेहा बोराने विष ओकले
रजाई यांच्या म्हणण्यानुसार, सौदी अरेबिया, तुर्कस्तान आणि पाकिस्तानच्या प्रतिनिधींनी इस्रायलच्या धोक्याबाबत तीव्र चिंता व्यक्त केली होती. असीम मुनीर यांनी इस्रायलच्या धोक्याचा उल्लेख करताना हिंदू आणि ज्यू यांच्यात मुस्लिम आणि पाकिस्तानविरोधात निर्माण होत असलेल्या संबंधांबाबत चिंता व्यक्त केली होती.
मे २०२५ मध्ये पाकिस्तानविरोधात भारताने राबवलेल्या ऑपरेशन सिंदूरदरम्यान इस्रायलने भारताच्या स्वसंरक्षणाच्या अधिकाराला उघडपणे पाठिंबा दिला होता. इस्रायलचे भारतातील राजदूत रुवेन अझर यांनी दहशतवाद्यांना लपण्यासाठी कुठेही जागा मिळणार नाही, अशी भूमिका मांडली होती.
पाकिस्तानचे ज्येष्ठ पत्रकार नजम सेठी यांनीदेखील आपल्या यूट्यूब कार्यक्रमात मोहसेन रजाई यांच्या खुलाशाचा उल्लेख केला आहे. सेठी म्हणाले की, रजाई हे असीम मुनीर यांनी त्यांच्याशी केलेल्या चर्चेबाबत माहिती देत होते. मुनीर यांनी हिंदू आणि ज्यू यांच्यातील वाढती आघाडी हा पाकिस्तानसाठी मोठा धोका असल्याचे सांगितल्याचा दावा सेठी यांनी केला.
सेठी यांच्या म्हणण्यानुसार, मुनीर यांनी या संबंधांना मुस्लिम आणि पाकिस्तानविरोधातील एक मोठे भू-राजकीय समीकरण असल्याचे संबोधले होते. मात्र, सेठी यांनीही हा दावा रजाई यांच्या माहितीच्या आधारेच केला आहे. त्यामुळे त्यांच्या वक्तव्याला स्वतंत्र पुष्टी मानता येणार नाही.
