उत्तर प्रदेशचे मुख्यमंत्री योगी आदित्यनाथ यांनी धनत्रयोदशी आणि दिवाळीदरम्यान फटाके फोडण्याचे समर्थन केले आहे. दिवाळीच्या उत्सवादरम्यान लोकांनी मोठ्या उत्साहात फटाके फोडल्याचे दृश्य पाहून आनंद झाल्याचे त्यांनी म्हटले आहे. देशभरात, विशेषतः दिल्ली-एनसीआर परिसरात वाढत्या वायुप्रदूषणाबाबत चिंता व्यक्त होत असताना योगी आदित्यनाथ यांनी हे वक्तव्य केले आहे.
योगी आदित्यनाथ म्हणाले की, भ्रष्ट कृत्यांद्वारे संपूर्ण व्यवस्था प्रदूषित करणाऱ्यांना कोणी प्रश्न विचारत नाही. मात्र, सामान्य नागरिकांनी एक दिवस फटाके फोडून आनंद साजरा केला की लगेच प्रदूषणाचा मुद्दा उपस्थित केला जातो. प्रदूषणाबाबत नागरिकांनी फारशी चिंता करू नये, असे आवाहनही योगी आदित्यनाथ यांनी केले. प्रदूषण झालेच, तरी कालांतराने ते कमी होईल, असे त्यांनी म्हटले.
दिवाळीच्या सणानिमित्त लोकांनी मोठ्या थाटामाटात आणि उत्साहात फटाके फोडून आतषबाजी केल्याबद्दल त्यांनी आनंद व्यक्त केला. त्यांच्या नेतृत्वाखालील भाजप सरकारने फटाके फोडण्यावर कोणतेही निर्बंध घालण्यास प्रोत्साहन दिले नसून, नागरिकांनी मुक्तपणे आणि उत्साहात सण साजरा करावा, अशी भूमिका घेतल्याचे त्यांनी सांगितले.
अयोध्येतील आपल्या दिवाळी उत्सवाच्या आठवणी सांगताना योगी आदित्यनाथ म्हणाले की, आपण स्वतःही आतषबाजीत सहभागी झालो होतो. सणांच्या काळात प्रदूषणाचा मुद्दा उपस्थित करणाऱ्यांवर टीका करताना ते म्हणाले की, इतर लोक सण साजरे करून आनंद व्यक्त करत असतानाच काही जणांना प्रदूषणाची आठवण होते.
हे ही वाचा:
भारताविरुद्ध न्यूझीलंडची कसोटी फौज सज्ज
एमआयचा ‘हिटमॅन’ पुन्हा कर्णधार होणार?
राष्ट्रवादीच्या विलीनीकरणाचा निर्णय शरद आणि सुनेत्रा पवारांच्याच हाती
अपघातप्रवण ठिकाणी आधीच तैनात असणार रुग्णवाहिका?
दरम्यान, ८ नोव्हेंबर रोजी साजऱ्या झालेल्या दिवाळीच्या आधीच देशातील अनेक शहरांमधील हवेची गुणवत्ता खालावली होती. दिल्ली आणि आसपासच्या नोएडा तसेच गुरुग्राम परिसरात दाट धुरक्याची चादर पसरली होती. हवेच्या गुणवत्ता निर्देशांकाने (एक्यूआय) अनेक निरीक्षण केंद्रांवर ४०० चा टप्पा ओलांडल्याने हवेची गुणवत्ता गंभीर श्रेणीत पोहोचली होती.
९ नोव्हेंबरच्या सकाळी दिल्लीतील हवेची गुणवत्ता पुन्हा गंभीर श्रेणीकडे सरकली होती. मागील वर्षाच्या तुलनेत यंदा दिल्लीतील प्रदूषणाची स्थिती अधिक खराब असल्याचे वृत्त आहे.
