जर्मनीची आघाडीची लक्झरी कार उत्पादक कंपनी मर्सिडीज-बेंझने पुण्यातील चाकण प्रकल्पाच्या माध्यमातून भारतातील गुंतवणूक वाढवण्याचा निर्णय घेतला आहे. इलेक्ट्रिक वाहनांच्या वाढत्या बाजारपेठेवर लक्ष केंद्रित करत कंपनीने उत्पादन क्षमता विस्तारण्याची तयारी केली आहे. यासाठी कंपनी आणखी २०० कोटी रुपयांची गुंतवणूक करणार असून, भारतातील तिची एकूण गुंतवणूक ३ हजार २०० कोटी रुपयांवर पोहोचणार आहे. भारतातील लक्झरी कार क्षेत्रातील ही मोठी गुंतवणूक मानली जात आहे. या निर्णयामुळे पुण्याचे जागतिक ऑटोमोबाईल उत्पादन क्षेत्रातील स्थान अधिक मजबूत होण्याची अपेक्षा आहे.
मर्सिडीज-बेंझच्या या विस्तारातील सर्वात महत्त्वाचे वैशिष्ट्य म्हणजे इलेक्ट्रिक जीएलसी कारचे उत्पादन. जर्मनीतील ब्रेमेननंतर पुण्यातील चाकण हे या नव्या इलेक्ट्रिक कारचे उत्पादन करणारे जगातील दुसरे केंद्र ठरले आहे. कंपनीच्या नव्या तंत्रज्ञानावर आधारित या कारमध्ये अत्याधुनिक डिजिटल सुविधा आणि नवीन ऑपरेटिंग सिस्टीमचा समावेश आहे. भारतात उत्पादित होणाऱ्या कंपनीच्या या नव्या पिढीतील इलेक्ट्रिक कारची एक्स-शोरूम किंमत ७८ लाख ५० हजार रुपये आहे. नोव्हेंबरच्या मध्यापासून ही कार ग्राहकांसाठी उपलब्ध होणार आहे. यामुळे भारतीय लक्झरी इलेक्ट्रिक वाहन बाजारपेठेत कंपनीची पकड अधिक मजबूत होण्याची शक्यता आहे.
हे ही वाचा:
‘जलसा’ बॉम्बने उडवण्याची पुन्हा धमकी
रंजीव पुरी बनले मिशिगन हाऊसचे पहिले भारतीय-अमेरिकी अध्यक्ष
हसन मुश्रीफांना मोठा दिलासा, ईडीचा तपास बंद
फ्रान्समध्ये महागाईविरोधात कामगारांचा उद्रेक
या गुंतवणुकीचा मोठा फायदा रोजगारनिर्मितीच्या दृष्टीने होणार आहे. चाकण येथील मर्सिडीज-बेंझ प्रकल्पात सुमारे १ हजार २०० जणांना थेट रोजगार मिळाला आहे. तर सुट्या भागांचा पुरवठा करणाऱ्या कंपन्या आणि संलग्न उद्योगांसह संपूर्ण पुरवठा साखळीत १८ हजारांहून अधिक रोजगार निर्माण झाले आहेत. उत्पादन क्षमता वाढल्यास या क्षेत्रातील कुशल मनुष्यबळाची मागणीही वाढू शकते. विशेषतः इंजिनिअरिंग, ऑटोमोबाईल तंत्रज्ञान, इलेक्ट्रॉनिक्स, गुणवत्ता नियंत्रण आणि सॉफ्टवेअर क्षेत्रातील तरुणांसाठी नव्या संधी उपलब्ध होण्याची शक्यता आहे.
एकीकडे भारतात इलेक्ट्रिक वाहनांचा वापर वाढत असताना दुसरीकडे जागतिक वाहन कंपन्याही भारतीय बाजारपेठेकडे मोठ्या संधी म्हणून पाहत आहेत. अशा परिस्थितीत मर्सिडीज-बेंझची पुण्यातील गुंतवणूक महाराष्ट्राच्या औद्योगिक विकासासाठी महत्त्वाची ठरणार आहे. चाकण, तळेगाव आणि पिंपरी-चिंचवड परिसरातील वाहन उद्योग, सुट्या भागांचे उत्पादक आणि स्थानिक पुरवठादारांनाही याचा फायदा होऊ शकतो. त्यामुळे ही गुंतवणूक केवळ लक्झरी कार उत्पादनापुरती मर्यादित नसून, पुण्याला इलेक्ट्रिक वाहन निर्मितीचे जागतिक केंद्र बनवण्याच्या दिशेने महत्त्वाचे पाऊल मानले जात आहे.
