बिहारमध्ये महिलांच्या सुरक्षेचा प्रश्न पुन्हा ऐरणीवर आला आहे. समस्तीपूर आणि जमुई येथील धक्कादायक घटनांनंतर आता बांका जिल्ह्यातील प्रसिद्ध मंदार हिलवर एका महिलेचा विनयभंग आणि मारहाण केल्याचा आरोप असलेली घटना समोर आली आहे. या घटनेचा व्हिडिओ सोशल मीडियावर व्हायरल झाल्यानंतर पोलिसांनी सहा अज्ञात तरुणांविरोधात गुन्हा दाखल केला आहे. व्हिडिओमध्ये हे तरुण महिलेसोबत अश्लील आणि गैरवर्तन करताना तसेच तिला चप्पलेने मारताना दिसत असल्याचे एफआयआरमध्ये नमूद करण्यात आले आहे.
मिळालेल्या माहितीनुसार, व्हिडिओवर ३ सप्टेंबरची तारीख दिसत आहे. मात्र हा व्हिडिओ पोलिसांच्या सोशल मीडिया सेलपर्यंत २२ सप्टेंबर रोजी पोहोचला. त्यानंतर बौंसी पोलिसांचे पथक तातडीने मंदार हिलवर पोहोचले आणि व्हिडिओमध्ये दिसणारे ठिकाण याच पर्यटनस्थळाचे असल्याची पडताळणी केली. पोलिसांनी परिसरातील दुकानदार आणि स्थानिक नागरिकांची चौकशी सुरू केली असून, व्हिडिओतील सहा तरुण आणि संबंधित महिलेची ओळख पटवण्याचे प्रयत्न सुरू आहेत. सध्या आरोपींची ओळख अधिकृतपणे पटलेली नाही.
हे ही वाचा:
इराणमधील आंदोलक जुळ्या मुली तुरुंगात… चेहरे सुजलेले, केस उपटून काढलेले, हाडे मोडलेली!
हाफिज सईदबद्दल प्रश्न विचारताच शरीफ पळाले
५ दिवसांचा वर्किंग वीक अजूनही लांबणीवर
“पुढच्या निवडणुका ईव्हीएम वर नकोत; बॅलेट पेपरवर घ्या”
या प्रकरणामुळे बिहारमधील सार्वजनिक ठिकाणी महिलांच्या सुरक्षेचा मुद्दा पुन्हा चर्चेत आला आहे. विशेष म्हणजे, गेल्या काही दिवसांत समस्तीपूरमध्ये एका अल्पवयीन मुलीचा छळ आणि मारहाण झाल्याचा व्हिडिओ समोर आला होता. त्यानंतर जमुईमध्येही दोन अल्पवयीन विद्यार्थ्यांना अडवून मुलीचा विनयभंग आणि दोघांना मारहाण केल्याचा प्रकार उघडकीस आला. जमुई प्रकरणात पोलिसांनी आरोपींवर कारवाई सुरू केली असून अनेकांना अटक करण्यात आली आहे.
आता बांका जिल्ह्यातील मंदार हिल प्रकरणामुळे या घटनांची मालिका पुन्हा चर्चेत आली आहे. पोलिसांनी व्हायरल व्हिडिओ पुरावा म्हणून ताब्यात घेतला असून भारतीय न्याय संहितेतील संबंधित कलमांसह माहिती तंत्रज्ञान कायद्यांतर्गत गुन्हा दाखल केला आहे. आरोपींची ओळख पटवून पुढील कारवाई करण्याचे पोलिसांचे प्रयत्न सुरू आहेत. मंदार हिलसारख्या प्रसिद्ध पर्यटनस्थळी घडलेल्या या घटनेमुळे तेथील सुरक्षा व्यवस्थेवरही प्रश्न उपस्थित झाले आहेत.
