बिहारमधील वैशाली येथे पंतप्रधान नरेंद्र मोदी यांनी शनिवारी सहा पदरी नितीश सेतूचे उद्घाटन केले. मात्र, या उद्घाटनानंतर काही तासांतच राष्ट्रीय जनता दलाच्या (आरजेडी) कार्यकर्त्यांनी पुलावर मोठा गोंधळ घातला. सत्ताधारी एनडीएचे पोस्टर आणि बॅनर फाडत लालू प्रसाद यादव आणि तेजस्वी यादव यांच्या समर्थनार्थ घोषणाबाजी करण्यात आली.
या घटनेचे व्हिडिओ सोशल मीडियावर मोठ्या प्रमाणात व्हायरल झाले आहेत. या व्हिडिओंमध्ये आरजेडीचे समर्थक पक्षाचे झेंडे फडकावताना, पोस्टर फाडताना आणि घोषणाबाजी करताना दिसत आहेत. बहुतांश कार्यकर्ते मोटारसायकलींवरून पुलावर आले होते. मोठ्या जमावासोबत पोलीस कर्मचारीही चालताना दिसत असून, परिस्थितीवर नियंत्रण मिळवण्यात त्यांना अडचणी येत असल्याचे व्हिडिओमध्ये दिसते.
हा गोंधळ जवळपास ४० मिनिटे सुरू होता. या घटनेनंतर भारतीय जनता पक्ष आणि विरोधी पक्ष आरजेडी यांच्यात राजकीय आरोप-प्रत्यारोप सुरू झाले आहेत.
भाजपचे प्रवक्ते नीरज कुमार शर्मा यांनी आरजेडीवर निशाणा साधला. विकासकामांचे स्वागत करण्याऐवजी विरोधी पक्ष राजकीय नाटके करून गोंधळ निर्माण करत असल्याचा आरोप त्यांनी केला. “सरकार विकासकामे करत आहे, तर आरजेडी मात्र अडथळे निर्माण करून गोंधळ घालण्यात व्यस्त आहे. बिहारच्या जनतेला पोस्टर फाडण्याचे राजकारण नको, तर पूल आणि विकास हवा आहे,” असे शर्मा म्हणाले.
हे ही वाचा:
औद्योगिक कोर सेक्टरच्या वाढीचा दर १०.९ टक्क्यांवर
कसोटी क्रिकेटमध्ये भारताचे ७०० धावांचे पंचक
पंतप्रधान मोदींच्या हस्ते ४ हजार कोटींच्या ‘नितीश सेतू’चे लोकार्पण
स्पाइसजेटची विमानसेवा विस्कळीत असतानाही तिकीट विक्री सुरूच
दुसरीकडे, आरजेडीचे खासदार सुधाकर सिंह यांनी रविवारी पक्षाच्या कार्यकर्त्यांच्या आंदोलनाचे समर्थन केले. या पुलाचे यापूर्वीच उद्घाटन झाले होते. केवळ त्याचे नामकरण करण्यासाठी कोट्यवधी रुपये खर्च करून दुसरा उद्घाटन सोहळा आयोजित करण्यात आला, असा आरोप त्यांनी केला.
“जे घडले ते आंदोलन होते आणि ज्यांनी हे केले ते योग्य होते. पोस्टर आणि बॅनर चुकीच्या पद्धतीने लावण्यात आले होते,” असे सुधाकर सिंह म्हणाले.
हा पूल तेजस्वी यादव यांच्या दूरदृष्टीमुळे उभारण्यात आल्याचा दावा करत त्यांनी मुख्यमंत्री नितीश कुमार यांच्यावरही टीका केली. नितीश कुमार यांनी कार्यक्रमाला उपस्थित राहणे टाळले, कारण त्यांच्या मुलाला धक्काबुक्की करण्यात आली होती आणि त्यामुळे त्यांची राजकीय कोंडी झाली असती, असा आरोप त्यांनी केला.
“या पुलाचे उद्घाटन यापूर्वीच झाले आहे. हा एक बनावट कार्यक्रम होता. आमच्या नेत्याने अशा बनावट कार्यक्रमाला उपस्थित का राहावे?” असा सवालही त्यांनी उपस्थित केला.
दरम्यान, २१ नोव्हेंबर रोजी पंतप्रधान नरेंद्र मोदी यांनी ९.७६ किलोमीटर लांबीच्या नितीश सेतूचे उद्घाटन केले. सुमारे ४,२८० कोटी रुपये खर्चून उभारण्यात आलेला हा सहा पदरी पूल कच्ची दरगाह आणि बिदुपूर यांना जोडतो. या पुलामुळे उत्तर आणि दक्षिण बिहारमधील दळणवळण अधिक सुलभ होण्यास मदत होणार असून, महात्मा गांधी सेतूवरील वाहतुकीचा ताणही कमी होण्याची अपेक्षा आहे.
पुलाच्या नामकरणावरून नवा वाद
पुलाच्या उद्घाटनासोबतच त्याच्या नामकरणावरून सुरू असलेला वाद पुन्हा एकदा चिघळला आहे. आरजेडीचे नेते तेजस्वी यादव यांनी या पुलाला दहावे शीख गुरू गुरू गोबिंद सिंह यांचे नाव देण्याऐवजी मुख्यमंत्री नितीश कुमार यांचे नाव देण्याच्या निर्णयावर प्रश्नचिन्ह उपस्थित केले.
