भोपाळच्या जुन्या शहर भागात गुरुवारी (२६ फेब्रुवारी २०२६) मोठी खळबळ उडाली. मध्य प्रदेशची राजधानी असलेल्या भोपाळमधील कोतवाली पोलीस ठाण्याच्या हद्दीतील लोहा बाजार आणि लखेरा बाजार परिसरात बुर्का परिधान केलेल्या एका महिलेला मंदिराजवळ मांसाचे तुकडे फेकताना पाहिल्याचा आरोप करण्यात आला.
या घटनेनंतर व्यापारी आणि स्थानिक नागरिकांनी तीव्र निषेध व्यक्त केला. परिसरात काही काळ तणावाची परिस्थिती निर्माण झाली. घटनेचा एक व्हिडिओ सोशल मीडियावर व्हायरल झाला असून त्यात संबंधित महिलेच्या हातात रक्ताचे डाग लागलेले हातमोजे दिसत असल्याचा दावा केला जात आहे.
हे ही वाचा:
लोकसंवादाची मराठी भाषा झाली समृद्ध….
केजरीवाल यांना न्यायालयीन दिलासा देण्याबाबत काय म्हणाले अण्णा हजारे?
मालेगाव पालिकेतील नमाज पठणावरून विद्युत अधीक्षक निलंबित
पाकिस्तानने अफगाणिस्तानविरुद्ध युद्धाची केली घोषणा
व्यापार्यांनी रंगेहात पकडल्याचा दावा
प्रत्यक्षदर्शींच्या म्हणण्यानुसार, संबंधित महिला मागील काही दिवसांपासून बाजारपेठ आणि मंदिरांच्या आसपास मांसाचे तुकडे टाकत होती. गुरुवारी व्यापाऱ्यांनी तिला रंगेहात पकडल्याचा दावा केला. तिच्या हातातील ग्लोव्ह्जवर रक्ताचे डाग स्पष्ट दिसत असल्याचे सांगितले जात आहे.
विरोध वाढल्यानंतर महिलेने आपली स्कूटी सोडून पळण्याचा प्रयत्न केल्याचे सांगितले जाते; मात्र उपस्थित नागरिकांनी तिला अडवले. व्यापाऱ्यांनी स्कूटीची चावी काढून घेत पोलिसांना माहिती दिली.
महिलेने स्पष्टीकरण देताना सांगितले की, ती एका स्वयंसेवी संस्थेशी संबंधित असून ती फक्त भटक्या कुत्र्यांना अन्न देत होती. पोलिसांसमोर तिने चूक झाल्याचे मान्य करत हात जोडून माफी मागितल्याची माहिती समोर आली आहे. तथापि, व्यापाऱ्यांचे म्हणणे आहे की, कुत्र्यांना खाऊ घालण्याच्या नावाखाली धार्मिक स्थळांना लक्ष्य करणे अयोग्य आहे आणि त्यामुळे भाविकांच्या भावना दुखावल्या गेल्या.
हिंदू उत्सव समितीकडून कारवाईची मागणी
घटनेनंतर हिंदू उत्सव समिती आणि स्थानिक व्यापाऱ्यांनी कोतवाली पोलीस ठाण्यात जाऊन निवेदन दिले. समितीच्या पदाधिकाऱ्यांनी ही कृती शांतता भंग करण्याचा प्रयत्न असल्याचा आरोप करत कठोर कायदेशीर कारवाईची मागणी केली. सार्वजनिक आणि धार्मिक स्थळांजवळ अशा प्रकारे मांस फेकणे स्वीकारार्ह नसल्याचे त्यांनी नमूद केले.
भोपाल पोलिसांनी परिस्थिती नियंत्रणात आणत तपास सुरू केला आहे. संबंधित महिलेचे निवेदन आणि व्हायरल व्हिडिओतील तथ्यांची पडताळणी केली जात असल्याचे अधिकाऱ्यांनी सांगितले. सध्या परिसरातील परिस्थिती नियंत्रणात असून खबरदारी म्हणून अतिरिक्त पोलीस बंदोबस्त तैनात करण्यात आला आहे.