अमेरिकेचे राष्ट्राध्यक्ष डोनाल्ड ट्रम्प यांनी अफगाणिस्तानला इशारा देत बग्राम हवाई तळ वॉशिंग्टनला परत करण्याची मागणी केली आहे अन्यथा त्याचे परिणाम भोगावे लागतील. “जर अफगाणिस्तानने बग्राम हवाई तळ बांधणाऱ्यांना, म्हणजेच अमेरिकेला परत दिला नाही, तर वाईट गोष्टी घडणार आहेत” असे राष्ट्रपतींनी शनिवारी (२० सप्टेंबर) त्यांच्या ट्रुथ सोशल प्लॅटफॉर्मवर लिहिले.
ते पुढे म्हणाले, “अमेरिकेने तो बेस त्यांना विनामूल्य दिला,” अशी तक्रार करत त्यांनी यावर असमाधान व्यक्त केले. ट्रम्प यांनी स्पष्ट केलं की बग्राम लष्करी तळाचे भू-राजकीय महत्त्व खूप मोठे आहे, कारण “तो चीनमध्ये अणु क्षेपणास्त्रे तयार होणाऱ्या भागापासून अवघ्या एका तासाच्या अंतरावर आहे.”
बग्राम एअर बेस हे अफगाणिस्तानमधील अमेरिकेचे सर्वात मोठे लष्करी तळ होते. काबूलच्या उत्तरेस सुमारे ४० किलोमीटरवर असलेला हा तळ दोन दशकांच्या युद्धादरम्यान अमेरिकन ऑपरेशन्सचे केंद्रबिंदू होता. मात्र, जुलै २०२१ मध्ये ट्रम्प-युगीन शांतता करारानंतर अमेरिका आणि नाटोने आपले सैन्य तेथून माघारी घेतले, आणि त्यानंतर काही महिन्यांत तालिबानने अफगाणिस्तानवर पुन्हा ताबा मिळवला.
हे ही वाचा :
तेजस्वी यादव समोर पंतप्रधानांच्या आईला शिवीगाळ; भाजपा म्हणाली–’बिहारच्या बहिणी हिशेब घेतील’
मल्याळम सुपरस्टार मोहनलाल यांना दादासाहेब फाळके पुरस्कार; पंतप्रधानांकडून अभिनंदन!
“आत्मनिर्भर भारतामध्ये आत्मनिर्भर युवा ही आपली संकल्पना”
एकनाथ शिंदेंचं एक्स अकाउंट हॅक; पाक-तुर्की ध्वजांसह पोस्ट शेअर!
सध्या बग्राम तळ तालिबान सरकारच्या नियंत्रणाखाली आहे, आणि त्यांनी परदेशी सैन्य पुन्हा देशात येण्याची शक्यता नाकारली आहे. “परदेशी लष्करी उपस्थितीसाठी अफगाणिस्तानची एक इंचही जमीन स्वीकार्य नाही,” असे परराष्ट्र मंत्री अमीर खान मुत्ताकी यांनी म्हटले आहे. इतर अफगाण अधिकाऱ्यांनीही या भूमिकेला दुजोरा दिला आहे. परराष्ट्र मंत्रालयाचे झाकीर जलाली यांनी लिहिले की अफगाणिस्तान राजकीय आणि आर्थिक सहभागासाठी खुले आहे परंतु “अमेरिकेला पुन्हा लष्करी उपस्थिती स्थापित करण्याची परवानगी दिली जाणार नाही.”