फिलिपिन्समधील मध्य भागातील सेबू येथील बिनालिव्ह परिसरात असलेल्या एका खासगी कचरा संकलन केंद्रात (लँडफिल) अचानक मोठ्या प्रमाणात कचऱ्याचा ढिगारा कोसळून गंभीर अपघात झाला. या दुर्घटनेत आतापर्यंत किमान चार जणांचा मृत्यू झाला असून सुमारे 34 कामगार कचऱ्याखाली अडकल्याची भीती व्यक्त केली जात आहे.
अपघाताच्या वेळी या ठिकाणी सुमारे 110 कामगार कार्यरत होते. ते कचऱ्याचे वर्गीकरण आणि व्यवस्थापनाचे काम करत होते. स्थानिक प्रशासनानुसार आतापर्यंत 12 कामगारांना जिवंत बाहेर काढण्यात यश आले असून त्यांना तातडीने रुग्णालयात दाखल करण्यात आले आहे. काही ठिकाणी कचऱ्याखालून आवाज येत असल्याचे बचाव पथकांना आढळून आले असून त्यामुळे अजूनही काही जण जिवंत असण्याची आशा व्यक्त केली जात आहे.
हे ही वाचा:
फिलिपिन्समधील कचऱ्याचा ढिगारा कोसळून भीषण अपघात
ओडिशात इंडिया वन एअरचे विमान कोसळले; पायलटसह प्रवासी जखमी
हल्दियात भारतीय नौदलाचा नवा बेस
आंतरराष्ट्रीय कॉल्स, आयएमईआय नंबर ओव्हरराईट… सायबर फसवणूक सिंडिकेटचा पर्दाफाश
अपघाताची माहिती मिळताच प्रशिक्षित बचाव पथके, अग्निशमन दल आणि स्थानिक अधिकारी घटनास्थळी दाखल झाले. मात्र कचऱ्याचा ढिगारा अत्यंत अस्थिर असल्याने आणि खोलवर कचरा साचलेला असल्याने बचावकार्य अत्यंत कठीण ठरत आहे. सुरक्षिततेच्या कारणास्तव शोधमोहीम अत्यंत काळजीपूर्वक राबवली जात असून ती रात्रंदिवस सुरू आहे.
सेबू सिटीचे महापौर नेस्टर आर्चिव्हल यांनी सांगितले की, बचावकार्य वेगाने पार पाडण्यासाठी मोठी क्रेन आणि जड यंत्रसामग्री मागवण्यात आली आहे. अडकलेल्या कामगारांच्या कुटुंबीयांसाठी घटनास्थळी स्वतंत्र प्रतीक्षास्थळ तयार करण्यात आले आहे.
या अपघाताचे नेमके कारण अद्याप स्पष्ट झालेले नाही. मात्र अलीकडील हवामानातील बदल, जमिनीतील ओलावा आणि कचऱ्याच्या ढिगाऱ्याची अस्थिर रचना यामुळे ही दुर्घटना घडली असावी, असा प्राथमिक अंदाज व्यक्त केला जात आहे. या घटनेमुळे फिलिपिन्समधील कचरा व्यवस्थापनाच्या सुरक्षिततेबाबत गंभीर प्रश्न उपस्थित झाले असून, अशा केंद्रांतील सुरक्षितता नियम अधिक कडक करण्याची मागणी होत आहे.