अमेरिका आणि इराण यांच्यात झालेल्या युद्धबंदीवरून आता नव्या वादाला तोंड फुटले आहे. शस्त्रसंधी कराराच्या व्याप्तीवरून अमेरिकेचे उपराष्ट्रपती जेडी व्हान्स आणि पाकिस्तानचे पंतप्रधान शाहबाज शरीफ यांच्या विधानांमध्ये वेगळेपणा असल्याचे समोर आले आहे. या तीव्र मतभेदांमुळे नवा वाद निर्माण झाला असून नेमके कोणाचे खरे असा प्रश्न उपस्थित झाला आहे. युद्धबंदी करारानंतर इस्रायलने यात लेबनॉनचा समावेश नसल्याचे स्पष्ट केले होते. शिवाय त्यांनी हल्ले सुरूच ठेवले आहेत. यावरून पुन्हा एकदा इराण आणि अमेरिका यांच्यातही वादाची ठिणगी पडल्याचे दिसत आहे.
युद्धविराम लेबनॉनपर्यंत वाढवण्यात आल्याच्या दाव्यांना व्हान्स यांनी जाहीरपणे फेटाळून लावले आहे. तसेच इराणने कराराच्या अटींचा चुकीचा अर्थ लावला असावा असा अंदाज त्यांनी व्यक्त केला आहे. “मला वाटते की हा एक गैरसमज आहे. आम्ही ते वचन कधीच दिले नव्हते,” असे व्हान्स म्हणाले आणि लेबनॉन कधीही युद्धविराम चौकटीचा भाग नव्हता, असे ठामपणे त्यांनी सांगितले.
याउलट, शरीफ यांनी यापूर्वी एका सार्वजनिक निवेदनात सूचित केले होते की, या शस्त्रसंधीमध्ये लेबनॉन आणि अमेरिकेच्या मित्र राष्ट्रांचा समावेश आहे, इतकेच नव्हे तर त्यांनी आपल्या घोषणेत व्हान्स यांचाही उल्लेख केला होता. त्यांच्या वक्तव्यांमधून, वॉशिंग्टन आता मान्य करत असलेल्या करारापेक्षा एक अधिक व्यापक करार असल्याचे सूचित होत होते.
वान्स यांनी स्पष्ट केले की, शस्त्रसंधीची व्याख्या मर्यादित असून ती इराण आणि वॉशिंग्टनच्या प्रादेशिक भागीदारांवर केंद्रित होती. “आम्ही असे म्हटले आहे की, युद्धविराम इराणवर केंद्रित असेल आणि अमेरिकेचे मित्रराष्ट्र असलेल्या इस्रायल आणि आखाती अरब देशांवरही केंद्रित असेल,” असे ते म्हणाले.
गेल्या महिन्यात हिजबुल्लाहसोबत संघर्ष सुरू झाल्यापासून इस्रायलने लेबनॉनवर केलेल्या सर्वात प्राणघातक हल्ल्यांमध्ये बुधवारी २५० हून अधिक लोक ठार झाले, त्याच वेळी ही घडामोड समोर आली. इराण-समर्थित सशस्त्र गटाने, ज्याने दोन आठवड्यांच्या अमेरिका-इराण शस्त्रसंधीअंतर्गत हल्ले काही काळासाठी थांबवले होते, त्यांनी लवकरच उत्तर इस्रायलच्या दिशेने रॉकेट हल्ले पुन्हा सुरू केले, ज्यामुळे या शस्त्रसंधीची नाजूक स्थिती अधोरेखित झाली. बुधवारी दुपारी, बेरूतवर एकापाठोपाठ किमान पाच हल्ले झाले, ज्यामुळे राजधानीवर धुराचे दाट लोट पसरले. इस्रायलने या कारवाईचे वर्णन युद्धातील आपला सर्वात मोठा समन्वित हल्ला असे केले आहे. लष्कराने सांगितले की, त्यांनी दहा मिनिटांच्या कालावधीत बेरूत, बेका खोरे आणि दक्षिण लेबनॉनमधील हिजबुल्लाहची १०० हून अधिक कमांड सेंटर्स आणि लष्करी लक्ष्यांवर हल्ला केला.
हे ही वाचा:
पाकिस्तानचे आर्थिक स्थैर्य संकटात
“विकसित भारतासाठी मातृशक्तीचे सामर्थ्य अत्यावश्यक”
“आम्ही पाकिस्तानला विश्वासार्ह देश मानत नाही” इस्रायली राजदूत असे का म्हणाले?
लेबनॉनच्या नागरी संरक्षण सेवेने सांगितले की, देशभरात २५४ लोकांचा मृत्यू झाला असून १,१०० हून अधिक लोक जखमी झाले आहेत. यामध्ये बेरूतमध्ये सर्वाधिक ९१ मृत्यूंची नोंद झाली आहे. तथापि, आरोग्य मंत्रालयाने देशभरात १८२ मृत्यू झाल्याचे सांगितले आणि हा आकडा तात्पुरता असल्याचेही स्पष्ट केले.