अमेरिकेचे राष्ट्राध्यक्ष डोनाल्ड ट्रम्प यांनी असा दावा केला आहे की भारत वर्षाच्या अखेरीस रशियाकडून होणारी तेल आयात मोठ्या प्रमाणात कमी करेल. या विधानावर काँग्रेसचे खासदार शशि थरूर यांनी गुरुवारी तीव्र प्रतिक्रिया देत ट्रम्प यांच्यावर टीका केली आणि म्हटले की, “भारताच्या वतीने घोषणा करण्याचा अधिकार ट्रम्प यांना नाही.”
थरूर यांनी एएनआयशी बोलताना सांगितले, “मला वाटत नाही की ट्रम्प यांनी भारताच्या निर्णयांविषयी जगासमोर घोषणा करणे योग्य आहे. भारत स्वतःच्या निर्णयांची घोषणा स्वतःच करेल. आम्ही जगाला सांगत नाही की ट्रम्प काय करणार आहेत; तसेच ट्रम्प यांनीही सांगू नये की भारत काय करणार आहे.”
बुधवारी (अमेरिकेच्या स्थानिक वेळेनुसार) ट्रम्प यांनी दावा केला होता की, पंतप्रधान नरेंद्र मोदी यांनी दिलेल्या हमीच्या आधारे भारत वर्षाच्या अखेरीस रशियन तेल आयात लक्षणीयरीत्या कमी करेल.
हे ही वाचा:
माजी राष्ट्रपती के. आर. नारायणन यांच्या पुतळ्याचे अनावरण
बिल गेट्स करणार ‘तुलसी’सोबत चर्चा
निवडणूक आयोगाकडून सर्व राज्यांना एसआयआर तयारीचे निर्देश
ट्रम्प यांनी हेही म्हटले की रशियन तेल आयात टप्प्याटप्प्याने कमी केली जाईल आणि वर्षाच्या अखेरीस ती “जवळजवळ शून्य” स्तरावर आणली जाईल.
त्यांच्या म्हणण्यानुसार, “भारताने मला सांगितले आहे की ते रशियन तेल घेणे थांबवतील. ही एक प्रक्रिया आहे; अचानक थांबवता येत नाही. पण वर्षाच्या अखेरीस ते जवळपास शून्यापर्यंत पोहोचतील. हे मोठं पाऊल आहे — कारण हे त्यांच्या तेलाचा जवळपास ४० टक्के हिस्सा आहे. मी काल पंतप्रधान मोदींशी बोललो आणि भारताचे पाऊल खूपच चांगले आहे,” असे ट्रम्प यांनी व्हाईट हाऊसमध्ये नाटो सरचिटणीस मार्क रूट यांच्यासोबतच्या संवादात सांगितले.
मात्र, भारताने या दाव्याचे खंडन केले असून स्पष्ट केले आहे की, ग्राहकांच्या हिताचे रक्षण करणे हेच त्यांचे सर्वोच्च प्राधान्य आहे. भारताची ऊर्जा धोरणे स्थिर दर आणि सुरक्षित पुरवठ्यावर आधारित आहेत.
ही संपूर्ण घडामोड त्या पार्श्वभूमीवर आहे, ज्यात ट्रम्प यांनी भारतीय वस्तूंवर ५० टक्के शुल्क लावले आहे आणि नवी दिल्लीला ऊर्जा स्रोतांचे विविधीकरण करण्याचे आवाहन केले आहे.