‘मेक इन इंडिया’ उपक्रमाला बळकटी देत अमेरिकेची जीई एरोस्पेस कंपनीने सोमवारी भारतीय वायुदलासोबत (IAF) महत्त्वाचा करार केला आहे. या करारानुसार भारतात एफ404-आयएन20 इंजिनसाठी दुरुस्ती आणि देखभाल (डिपो) सुविधा उभारली जाणार आहे. ही इंजिने एचएएलच्या तेजस फायटर जेटला शक्ती देतात. ही नवी सुविधा भारतातच उभारली जाणार असून तिचे संचालन भारतीय वायुदल करणार आहे, तर जीई एरोस्पेस तांत्रिक सहकार्य देणार आहे.
या उपक्रमाचा उद्देश भारताची स्वदेशी संरक्षण देखभाल क्षमता वाढवणे आणि इतर देशांवरील अवलंबित्व कमी करणे हा आहे. ही सुविधा कार्यान्वित झाल्यानंतर इंजिन दुरुस्ती आणि देखभालीस लागणारा वेळ मोठ्या प्रमाणात कमी होईल, त्यामुळे तेजस फायटर जेटची उपलब्धता अधिक सुधारेल. या करारानुसार हा डिपो पूर्णपणे भारतीय वायुदलाच्या मालकीचा आणि नियंत्रणाखाली असेल. जीई एरोस्पेसकडून तांत्रिक कौशल्य, प्रशिक्षण, सहाय्यक कर्मचारी तसेच आवश्यक स्पेअर पार्ट्स आणि विशेष उपकरणे उपलब्ध करून दिली जातील.
जीई एरोस्पेसच्या डिफेन्स अँड सिस्टिम्स सेल्स आणि बिझनेस डेव्हलपमेंटच्या उपाध्यक्ष रीटा फ्लेहर्टी यांनी सांगितले की, ही भागीदारी भारताच्या सशस्त्र दलांना अधिक सक्षम करण्याच्या कंपनीच्या वचनबद्धतेचे प्रतीक आहे. त्यांनी म्हटले की, या सुविधेमुळे तेजस ताफ्यासाठी एफ404-आयएन20 इंजिनांची उपलब्धता सुधारेल आणि भारतीय वायुदलाला वेळेवर आधुनिक तंत्रज्ञान मिळेल.
हे ही वाचा:
नोएडात वेतनवाढीच्या आंदोलनाला हिंसक वळण
आत्मनिर्भर भारताची झेप; लखनऊत तयार ब्रह्मोस सैन्याच्या ताफ्यात
पाकव्याप्त काश्मीर आणि अफगाण सीमेजवळ चीनचा नवा प्रांत
२००२ गुजरात दंगल प्रकरणात नऊ हिंदू निर्दोष
जीई एरोस्पेसने भारतातील संरक्षण क्षेत्रातील आपल्या व्यापक उपस्थितीचाही उल्लेख केला. कंपनीची इंजिने इंडियन नेव्हीच्या पी-8I समुद्री गस्त विमानांमध्ये, एमएच-60आर हेलिकॉप्टरमध्ये तसेच भारतीय वायुदलाच्या एएच-64 अपाचे हेलिकॉप्टरमध्ये वापरली जातात. याशिवाय, कंपनीच्या एलएम2500 मरीन गॅस टर्बाइनचा वापर आयएनएस विक्रांत आणि पी-17 शिवालिक वर्गातील फ्रिगेट्समध्येही करण्यात आला आहे. कंपनी गेल्या ४० वर्षांपासून भारताच्या विमानवाहतूक क्षेत्राचा भाग आहे. पुण्यात तिचा उत्पादन प्रकल्प असून देशातील १३ भागीदार तिच्या जागतिक पुरवठा साखळीशी जोडलेले आहेत, ज्यामुळे भारतातील तिची उपस्थिती अधिक मजबूत झाली आहे.