कॅनडाच्या राष्ट्रीय सुरक्षा व गुप्तचर सल्लागार नथाली जी. ड्रोइन यांनी गुरुवारी नवी दिल्ली येथे भारताचे राष्ट्रीय सुरक्षा सल्लागार (एनएसए) अजित डोवाल यांची भेट घेतली. त्यांचा हा दौरा दोन्ही देशांमधील नियमित द्विपक्षीय सुरक्षा संवादाचा एक भाग होता. चर्चेदरम्यान दोन्ही देशांनी परस्पर सहकार्याच्या भूमिकेतून द्विपक्षीय संबंधांना नव्या उंचीवर नेण्याचे ठरविले. भारतीय परराष्ट्र मंत्रालयाने शनिवारी प्रसिद्धिपत्रक काढून दोन्ही देशांच्या एनएसएमधील चर्चेची माहिती दिली. या चर्चेत राजकीय नेतृत्वाच्या उच्च पातळीवर विश्वास पुनर्संचयित करण्याची आणि सहकार्याचा विस्तार करण्याची स्पष्ट गती असल्याचे दोन्ही पक्षांनी मान्य केले.
दहशतवादविरोध, आंतरराष्ट्रीय गुन्ह्यांवर नियंत्रण आणि गुप्त माहितीच्या आदानप्रदानासह दोन्ही देशांमधील संबंध पुढे नेण्यासाठी उपयुक्त चर्चा करण्यात आली. दोन्ही देशांनी सुरक्षा सहकार्य अधिक मजबूत करण्यास आणि विद्यमान यंत्रणा अधिक सक्षम करण्यास सहमती दर्शविली. भविष्यातील सहकार्याच्या प्राधान्यक्रमांवरही विचारविनिमय झाला तसेच प्रादेशिक आणि जागतिक घडामोडींवर मतांची देवाणघेवाण झाली.
हेही वाचा..
पंतप्रधान मोदींना मिळाले अनोखे पेंटिंग
इतिहाससाधनेला जीवन अर्पण करणारा ऋषितुल्य संशोधक
इतर देशांवर असलेले अवलंबित्व हाच आपला शत्रू!
कॅनडाच्या एनएसए नथाली जी. ड्रोइन यांचा हा दौरा, जून महिन्यात अल्बर्टा प्रांतातील कनानास्किस येथे झालेल्या जी-7 शिखर परिषदेदरम्यान पंतप्रधान नरेंद्र मोदी आणि पंतप्रधान मार्क कार्नी यांच्यात झालेल्या चर्चेचा पुढचा टप्पा मानला जात आहे. मार्क कार्नी आणि नरेंद्र मोदी यांनी द्विपक्षीय बैठकीदरम्यान भारत-कॅनडा संबंध सुधारण्यासोबतच व्यापार, ऊर्जा, कृत्रिमरीत्या जीवनोपयोगी साधने अशा अनेक मुद्द्यांवर आणि क्षेत्रांमध्ये सहकार्य वाढवण्यावर चर्चा केली होती.
कॅनडाचे पंतप्रधान मार्क कार्नी यांच्या निमंत्रणावरून जी-७ शिखर परिषदेत सहभागी झालेल्या नरेंद्र मोदी यांनी म्हटले होते की भारत आणि कॅनडा परस्पर सन्मान व सामायिक हितांच्या आधारे एकत्रितपणे काम करतील. पंतप्रधान मोदी यांनी दहशतवादाबाबत दुटप्पी भूमिका घेतली जाते, यावरही भाष्य केले होते. काही देश उघडपणे दहशतवादाला पाठिंबा देतात आणि तरीही त्याचे फायदे मिळवतात, असे ते म्हणाले होते.