नासाच्या आर्टेमिस II मोहिमेअंतर्गत, गुरुवार, २ एप्रिल रोजी भारतीय प्रमाणवेळेनुसार पहाटे ४:०४ वाजता अमेरिकेतील फ्लोरिडा येथून अवकाश यानाने चार अंतराळवीरांना घेऊन चंद्राकडे झेप घेतली. चंद्राभोवतीचा हा महत्त्वपूर्ण १० दिवसांचा प्रवास आहे. आर्टेमिस II चे अंतराळवीर अंतराळातील अशा ठिकाणी प्रवास करतील जिथे मानव यापूर्वी कधीही पोहोचला नव्हता.
तीन वर्षांच्या प्रशिक्षणानंतर, या चार सदस्यीय चमूने नासाच्या आर्टेमिस कार्यक्रमांतर्गत उड्डाण केले. हा कार्यक्रम २०१७ मध्ये सुरू झालेल्या अब्जावधी डॉलर्सच्या मोहिमांची एक मालिका आहे. पुढील दशकात आणि त्यानंतरही चंद्रावर अमेरिकेचे दीर्घकालीन अस्तित्व सुनिश्चित करणे, हे त्याचे उद्दिष्ट आहे. नासाने कळवले आहे की ओरियन अंतराळयान डीप स्पेस नेटवर्कच्या संपर्कात आहे.
आर्टेमिस II चे चार अंतराळवीर; तीन पुरुष आणि एक महिला आहेत. चंद्रावर जाणाऱ्या नासाच्या या संघात अमेरिकन नागरिक रीड वाईजमन, व्हिक्टर ग्लोव्हर आणि क्रिस्टीना कोच यांच्यासोबत कॅनेडियन नागरिक जेरेमी हॅन्सन यांचा समावेश आहे. हा संघ १० दिवसांच्या मोहिमेवर चंद्रावर न उतरता पृथ्वीच्या उपग्रहाभोवती प्रदक्षिणा घालेल. पृथ्वीच्या कक्षेत साडेतीन तासांच्या उड्डाणानंतर अंतराळवीरांचे गमड्रॉपच्या आकाराचे ओरियन कॅप्सूल एसएलएसच्या वरच्या टप्प्यापासून वेगळे होईल. यानंतर, अंतराळवीर यानाचा ताबा स्वतः घेतील आणि त्याचे नियंत्रण व गतिशीलता तपासतील.
हे ही वाचा:
“तो षटकार… आणि भारत विश्वविजेता!”
कर्णधार श्रेयस अय्यरला १२ लाखांचा दंड
मुंबई विमानतळावर ब्लिंकिटची सुपरफास्ट सेवा
आर्टेमिस II मोहीम महत्त्वपूर्ण आहे कारण, अपोलो नंतर प्रथमच अंतराळवीर पृथ्वीच्या निम्न कक्षेतून बाहेर पडून, अंतराळात खोलवर प्रवास करतील, चंद्राभोवती प्रदक्षिणा घालतील आणि परत येतील. जेव्हा अंतराळवीर चंद्राच्या पलीकडच्या बाजूला पोहोचतील, तेव्हा ते पृथ्वीपासून ४५०,००० किलोमीटर दूर असतील. यामुळे हा इतिहासातील सर्वात दूरचा मानवी अंतराळ प्रवास ठरेल, जो ५० वर्षांपूर्वी प्रस्थापित झालेला अंतराचा विक्रम मोडेल. अंतराळवीर चमू २५ तास पृथ्वीभोवती एका उंच, लंबवर्तुळाकार कक्षेत प्रदक्षिणा घालतील. स्वयंचलित प्रणालींऐवजी प्रत्यक्ष निरीक्षणावर अवलंबून, ते ओरियनला त्या टप्प्याच्या १० मीटरच्या आत नियंत्रित करतील.