भारतीय महिला संघाची स्टार फलंदाज जेमिमा रॉड्रिग्ज महिला बिग बॅश लीगमध्ये उर्वरित सामन्यांसाठी उपलब्ध राहणार नाही, अशी माहिती त्यांच्या संघाने — ब्रिस्बेन हीटने — अधिकृतपणे दिली आहे.
ब्रिस्बेन हीटने स्पष्ट केले की, “जेमिमा रॉड्रिग्ज महिला बिग बॅशचे उर्वरित सामने खेळण्यासाठी ऑस्ट्रेलियाला परतणार नाहीत. १० दिवसांपूर्वी होबार्ट हॅरिकेन्सविरुद्धच्या सामन्यानंतर त्या स्मृती मंधानाच्या लग्नासाठी भारतात आल्या होत्या. पण त्यांच्या वडिलांची तब्येत बिघडल्यामुळे जेमिमाने कार्यक्रम रद्द केला आणि कुटुंबाला साथ देण्यासाठी भारतात राहण्याचा निर्णय घेतला. संघ तिच्या निर्णयाचा सन्मान करतो.”
हीटचे सीईओ टेरी स्वेनसन म्हणाले, “जेमीसाठी हा काळ खूप कठीण आहे. दुखःद बाब म्हणजे ती पुढील सामन्यांमध्ये खेळू शकणार नाही. पण भारतात राहण्याच्या तिच्या विनंतीचा आम्ही आदर केला. हीट क्लब त्यांच्या आणि स्मृती मंधाना यांच्या कुटुंबाला शुभेच्छा देतो. जेमी आमची टॉप इंटरनॅशनल ड्राफ्ट पिक होती, त्यामुळे फॅन्स निराश आहेत, पण तिच्या भल्यालाच आम्ही प्राधान्य देतो.”
ते पुढे म्हणाले, “जेमीने परत येऊ न शकल्याचा तिला मोठा खेद आहे, पण फॅन्स आणि क्लबने परिस्थिती समजून घेतल्याबद्दल तिने आभार मानले आहेत. ती खेळाडूंशी संपर्कात आहे आणि उर्वरित सामन्यांसाठी संघाला शुभेच्छा दिल्या आहेत.”
जेमिमा रॉड्रिग्ज भारतीय महिला क्रिकेटमधील सर्वात प्रतिभावान फलंदाजांपैकी एक मानली जाते. २०२५ महिला विश्वचषकातील सेमीफायनलमध्ये खेळलेली तिची १२७ धावांची धडाकेबाज खेळी आजही चाहत्यांच्या आठवणीत ताजी आहे. या खेळीमुळे ऑस्ट्रेलियाने विक्रमी धावसंख्या पार करून फायनलमध्ये प्रवेश केला होता. त्यामुळे जेमिमाची लोकप्रियता भारतातच नव्हे तर ऑस्ट्रेलियातही प्रचंड वाढली. म्हणूनच ब्रिस्बेन हीटचे फॅन्स तिच्या पुनरागमनाची आतुरतेने वाट पाहत होते.