पंजाबमध्ये अमली पदार्थांविरोधातील मोहिमेला मोठे यश मिळाले असून पंजाब पोलीस यांनी पाकिस्तानशी संबंधित आंतरराष्ट्रीय नार्को-तस्करी नेटवर्कचा पर्दाफाश केला आहे. अमृतसर जिल्ह्यातील गहरिंडा पोलीस ठाण्याच्या हद्दीत करण्यात आलेल्या या कारवाईत तब्बल ५१.५ किलो हेरॉईन जप्त करण्यात आले असून दोन आरोपींना अटक करण्यात आली आहे. जप्त करण्यात आलेले हेरॉईन १०३ पॅकेट्समध्ये व्यवस्थित पॅक केलेले होते. आंतरराष्ट्रीय बाजारात या हेरॉईनची किंमत कोट्यवधी रुपये असल्याचा अंदाज पोलिसांनी व्यक्त केला आहे.
पोलिसांना मिळालेल्या गुप्त माहितीच्या आधारे ही मोठी कारवाई करण्यात आली. संशयित आरोपी मोटारसायकलवरून जात असताना पोलिसांनी त्यांना थांबवले आणि झडती घेतली. झडतीदरम्यान त्यांच्या ताब्यातून मोठ्या प्रमाणावर हेरॉईन आढळून आले. प्राथमिक तपासात हे स्पष्ट झाले आहे की हे आरोपी पाकिस्तानमधील हँडलर्सच्या थेट संपर्कात होते आणि सीमापार मार्गाने भारतात अमली पदार्थांची तस्करी करत होते.
हे ही वाचा:
सेन्सेक्स–निफ्टीत घसरण
हिंदुस्तान एरोनॉटिक्स Dhruv-NG हेलिकॉप्टर्सची करणार निर्मिती; १,८०० कोटींची ऑर्डर
येत्या रविवारी संस्कार भारती भरतमुनी सन्मान सोहळा रंगणार
शाळांमध्ये विद्यार्थिनींना मिळणार मोफत सॅनिटरी नॅपकिन्स
तपासादरम्यान आरोपींच्या मोबाईल फोनमधून महत्त्वाचे डिजिटल पुरावे पोलिसांच्या हाती लागले आहेत. कॉल रेकॉर्ड्स, संदेश आणि इतर तांत्रिक माहितीच्या आधारे हे निष्पन्न झाले आहे की हे प्रकरण केवळ स्थानिक पातळीपुरते मर्यादित नसून आंतरराष्ट्रीय स्तरावर कार्यरत असलेल्या संघटित टोळीशी संबंधित आहे. पोलिस आता या नेटवर्कमधील इतर सदस्य, स्थानिक दुवे आणि पाकिस्तानमधील सूत्रधारांचा सखोल शोध घेत आहेत.
या संपूर्ण प्रकरणी गहरिंडा पोलीस ठाण्यात एनडीपीएस म्हणजेच अमली पदार्थ कायद्याअंतर्गत गुन्हा दाखल करण्यात आला आहे. अटक करण्यात आलेल्या आरोपींना न्यायालयात हजर करण्यात येणार असून पुढील तपास सुरू आहे. वरिष्ठ पोलीस अधिकाऱ्यांनी सांगितले की, पंजाबमध्ये अमली पदार्थांची तस्करी पूर्णपणे मोडून काढण्यासाठी पोलिस यंत्रणा सातत्याने कठोर पावले उचलत आहे.