महाराष्ट्राच्या राजकारणात सध्या मोठी खळबळ उडाली आहे. राज्याचे मंत्री नरहरी झिरवाळ यांचा एक आक्षेपार्ह व्हिडिओ सोशल मीडियावर व्हायरल झाला असून त्यावरून विरोधकांनी सरकारवर जोरदार टीका केली आहे. या व्हिडिओमध्ये झिरवाळ एका ट्रान्सजेंडर व्यक्तीसोबत दिसत असल्याचा दावा केला जात आहे. हा व्हिडिओ त्यांच्या सरकारी निवासस्थानी शूट झाल्याचेही सांगितले जात आहे. मात्र, या व्हिडिओची अधिकृत पुष्टी अद्याप झालेली नसल्यामुळे याबाबत संभ्रम कायम आहे.
हे ही वाचा:
इतिहास संशोधक डॉ. जयसिंगराव पवार यांचे निधन
सोनं-चांदीत अस्थिरता कायम; गुंतवणूकदारांसाठी संधी की धोका?
वडिलांना भेटू देत नसल्याने इम्रान खान यांच्या मुलाने ठोठावले यूएनएचआरसीचे दार
भारत आमचा मित्र, त्यांना सामुद्रधुनी खुली!
या प्रकरणावर काँग्रेसचे प्रदेशाध्यक्ष हर्षवर्धन सपकाळ यांनी तीव्र प्रतिक्रिया देत हा प्रकार अत्यंत गंभीर असल्याचे म्हटले आहे. त्यांनी सोशल मीडियावर पोस्ट करत जनतेचा विश्वास जपण्याची जबाबदारी असलेल्या व्यक्तींनी असे वर्तन करणे अयोग्य असल्याचे सांगितले. तसेच त्यांनी मुख्यमंत्री यांनी तात्काळ कारवाई करून झिरवाळ यांना मंत्रिपदावरून हटवावे, अशी मागणी केली आहे.
काँग्रेस नेते विजय वडेट्टीवार यांनी या प्रकरणामागे सत्ताधारी गटातील अंतर्गत राजकारण असू शकते, असा संशय व्यक्त केला आहे. त्यांच्या मते, हा व्हिडिओ जाणीवपूर्वक व्हायरल करण्यात आला असण्याची शक्यता नाकारता येत नाही. त्यामुळे या प्रकरणाकडे केवळ नैतिकतेच्या दृष्टीने नव्हे तर राजकीय घडामोडींच्या दृष्टीनेही पाहण्याची गरज आहे.
दरम्यान, राष्ट्रवादी काँग्रेसचे नेते जयंत पाटील यांनी सावध भूमिका घेतली आहे. त्यांनी सांगितले की, पूर्ण सत्य समोर आल्यानंतरच प्रतिक्रिया देणे योग्य ठरेल. घाईघाईत निष्कर्ष काढणे टाळावे, असे त्यांनी स्पष्ट केले.
या घटनेवर सामाजिक कार्यकर्त्या अंजली दमानिया यांनीही प्रतिक्रिया दिली आहे. त्यांनी या प्रकरणाची सखोल चौकशी करण्याची मागणी करत, जर आरोप खरे असतील तर ही अतिशय गंभीर बाब असल्याचे म्हटले आहे.
सध्या या प्रकरणात अनेक प्रश्न निर्माण झाले आहेत. व्हिडिओची सत्यता काय आहे, तो कुणी आणि का व्हायरल केला, यामागे राजकीय कट आहे का, याबाबत अजून स्पष्टता आलेली नाही. मात्र, या घटनेमुळे महाराष्ट्रातील राजकीय वातावरण चांगलेच तापले असून पुढील काही दिवसांत या प्रकरणावर सरकार काय भूमिका घेते, याकडे सर्वांचे लक्ष लागले आहे.