भारतीय शेअर बाजाराने गुरुवारी दमदार सुरुवात करत एका टप्प्यावर सेन्सेक्सने तब्बल ६०० हून अधिक अंकांची उसळी घेतली होती. कच्च्या तेलाच्या किमतीतील घसरण, रुपयातील मजबुती आणि जागतिक बाजारांकडून मिळालेल्या सकारात्मक संकेतांमुळे गुंतवणूकदारांनी सुरुवातीला जोरदार खरेदी केली. मात्र व्यवहाराच्या उत्तरार्धात मोठ्या प्रमाणावर नफावसुली झाल्याने ही तेजी टिकू शकली नाही आणि दिवसअखेरीस बाजाराने बहुतांश वाढ गमावली. तरीही सेन्सेक्स सुमारे १०९ अंकांच्या किरकोळ वाढीसह बंद झाला, तर निफ्टीने २४,०५० च्या वर आपले स्थान कायम ठेवले.
दिवसभरातील चढ-उतारांमध्ये वाहन, विमान वाहतूक आणि काही निवडक क्षेत्रांतील शेअर्समध्ये चांगली खरेदी दिसून आली. दुसरीकडे, अलीकडील तेजीचा फायदा घेत अनेक गुंतवणूकदारांनी नफावसुलीचा मार्ग स्वीकारल्याने निर्देशांकांवरील दबाव वाढला. सेन्सेक्स फ्युचर्सच्या मासिक एक्स्पायरीचाही बाजारातील अस्थिरतेवर परिणाम झाल्याचे विश्लेषकांनी नमूद केले आहे.
हे ही वाचा:
मुंबईत मुसळधार पाऊस, पण धरणे अजूनही रिकामी
“पत्रकारांविषयी अपमानास्पद वक्तव्य करण्याचा हेतू नव्हता”
कांजूरमार्ग-घणसोली-बदलापूर मेट्रो-१४ला मोठा ब्रेक
७८ वर्षांनंतर पहिली खासगी सोन्याची खाण सुरू
विश्लेषकांच्या मते, आंतरराष्ट्रीय बाजारातील सुधारलेले वातावरण, कच्च्या तेलाच्या किमतीत झालेली घसरण आणि रुपयाला मिळालेला आधार यामुळे भारतीय बाजाराची दीर्घकालीन दिशा सकारात्मक राहू शकते. मात्र अल्पकालीन काळात नफावसुली आणि जागतिक आर्थिक घडामोडींमुळे अस्थिरता कायम राहण्याची शक्यता आहे. विशेषतः अमेरिकेतील महागाईशी संबंधित आकडेवारी आणि व्याजदरांबाबतचे संकेत यावर पुढील काही दिवसांत गुंतवणूकदारांचे लक्ष राहणार आहे.