अमेरिकेतून हद्दपार करण्यात आलेल्या कुख्यात लॉरेन्स बिश्नोई टोळीच्या महत्त्वाच्या सदस्याला, म्हणजेच लॉरेन्सचा भाऊ अनमोल बिश्नोईला, राष्ट्रीय तपास संस्थेने (एनआयए) अखेर अटक केली आहे. २०२२ पासून परदेशात फरार असलेल्या अनमोलच्या प्रत्यार्पणासाठी भारत सातत्याने प्रयत्न करत होता. हद्दपारीनंतर त्याला भारतात आणताच एनआयएने ताब्यात घेतले.
एनआयएने दिलेल्या माहितीनुसार, अनमोल हा लॉरेन्स बिश्नोईच्या नेतृत्वाखालील दहशतवादी कटात सहभागी असल्याबाबत अटक झालेला १९ वा आरोपी आहे. २०२० ते २०२३ या कालावधीत देशभरात घडलेल्या विविध दहशतवादी कृत्यांमध्ये त्याचा सक्रिय सहभाग असल्याचे तपासात उघड झाले होते. त्यानंतर मार्च २०२३ मध्ये त्याच्याविरुद्ध आरोपपत्र दाखल करण्यात आले होते.
तपासात असेही निष्पन्न झाले आहे की, अनमोलने अमेरिकेतूनच टोळीचे ऑपरेशन चालू ठेवले होते. भाऊ लॉरेन्स आणि दहशतवादी गोल्डी ब्रार यांच्या सिग्नलवर भारतातील जमिनीवरील कार्यकर्त्यांचा वापर करून अनेक कारवाया राबवण्यात त्याचा हात होता. टोळीतील शूटर आणि ग्राउंड ऑपरेटिव्हसाठी आश्रय, निधी आणि लॉजिस्टिक सपोर्ट पुरवण्याचे काम अनमोलकडेच होते.
हे ही वाचा:
सम्राट चौधरी, विजय सिन्हाचं राहणार बिहारचे उपमुख्यमंत्री!
आंध्र प्रदेशात ‘टेक’ शंकरसह सात नक्षलवादी ठार
दोन गटांत फुटलेली काँग्रेस राहुल गांधींना वाचवण्यात गुंतली
याशिवाय, परदेशातून भारतातील व्यापारी आणि उद्योगपतींना लक्ष्य करून खंडणी वसुलीच्या रॅकेटमध्येही अनमोलची थेट सहभागिता असल्याचे तपासात स्पष्ट झाले आहे. इतर गुंडांच्या मदतीने तो हे रॅकेट चालवत होता, असे एनआयएने म्हटले आहे.
दहशतवादी, गुंड आणि शस्त्रास्त्र तस्कर यांच्यातील गुंतागुंतीचे जाळे नष्ट करण्याच्या व्यापक मोहिमेअंतर्गत एनआयए आरसी ३९/२०२२/एनआयए/डीएलआय (लॉरेन्स बिश्नोई दहशतवाद–गुंड कट प्रकरण) या खटल्याची तपासणी करत आहे. या प्रकरणात अनमोल बिश्नोई हा अत्यंत महत्त्वाचा दुवा मानला जात असून, त्याच्या अटकेमुळे तपासाला मोठी गती मिळणार असल्याचा विश्वास तपास यंत्रणांनी व्यक्त केला आहे.