पाकिस्तानविरोधात हल्ल्याची योजना आणि दहशतवादी संघटनेशी कथित संबंध असल्याच्या संशयावरून बंगळुरू पोलिसांनी पश्चिम बंगालमधील २५ वर्षीय असफूल मलिक याला अटक केली आहे. मलिकचा तेहरीक-ए-तालिबान पाकिस्तान (टीटीपी ) शी संबंधित व्यक्तीशी संपर्क असल्याचा पोलिसांचा दावा आहे. त्याला अफगाणिस्तानला जाऊन टीटीपी मध्ये सहभागी व्हायचे होते, अशी माहिती तपासातून समोर आली आहे.
मलिक हा पश्चिम बंगालमधील उत्तर २४ परगणा जिल्ह्यातील नाओपारा गावचा रहिवासी असून, बंगळुरूच्या जिगणी परिसरात राहत होता. डिसेंबर २०२५ पासून तो जिगणी औद्योगिक परिसरातील टाटा अॅडव्हान्स्ड लिमिटेडमध्ये सुरक्षा रक्षक म्हणून काम करत होता. बोम्मसंद्र औद्योगिक परिसरात गस्त घालत असताना पोलिसांना त्याच्या संशयास्पद ऑनलाइन हालचालींची माहिती मिळाली. त्यानंतर चौकशी करून त्याला ताब्यात घेण्यात आले.
पोलिसांच्या माहितीनुसार, मलिकने फेसबुकच्या माध्यमातून अफगाणिस्तानातील इम्रान हैदर नावाच्या व्यक्तीशी संपर्क साधला होता. ही व्यक्ती टीटीपी शी संबंधित असल्याचा पोलिसांचा संशय आहे. मलिकने त्याच्या मदतीने अफगाणिस्तानला जाण्याचा प्रयत्न केला आणि त्यासाठी व्हिसासाठी अर्जही केला होता. मात्र आर्थिक अडचणी आणि कुटुंबाची जबाबदारी यामुळे त्याने हा निर्णय नंतर सोडून दिल्याचे पोलिसांनी सांगितले.
मलिकच्या मोबाईल फोनच्या तपासणीत इम्रान हैदरसोबतचे कथित चॅट, व्हॉइस कॉल आणि ऑडिओ संभाषण आढळल्याचे पोलिसांनी सांगितले. या डिजिटल पुराव्यांची तपासणी सुरू असून, त्याचे टीटीपी शी संबंध आणि अफगाणिस्तानला जाण्यामागील नेमका उद्देश तपासला जात आहे.
हे ही वाचा:
मोदींचा ‘बांधणी फेटा’ चर्चेत; वस्त्रपरंपरेला अनोखी मानवंदना!
मोदी ठरले सलग सर्वाधिक स्वातंत्र्यदिनाचे भाषण करणारे गैर-काँग्रेसी पंतप्रधान!
ऐतिहासिक क्षण! लाल किल्ल्यावर प्रथमच ‘वंदे मातरम्’चा जयघोष
वर्षभरात १ कोटी तरुणांना एआय प्रशिक्षण; स्पर्धा परीक्षांसाठी मोफत ऑनलाइन कोचिंग
पोलिसांच्या दाव्यानुसार, मलिक पाकिस्तानमधील लष्कराच्या कथित कारवायांबद्दल संतप्त होता. मशिदी आणि नागरिकांवरील कथित हल्ले तसेच इस्रायल-पॅलेस्टाईन संघर्षातील पाकिस्तानच्या भूमिकेबाबत त्याने नाराजी व्यक्त केली होती. त्यातून पाकिस्तानविरोधात कारवाई करण्याचा विचार त्याच्या मनात निर्माण झाल्याचा पोलिसांचा दावा आहे.
दरम्यान, मलिकच्या डिजिटल उपकरणांमधील माहितीच्या आधारे भारत किंवा पाकिस्तानमध्ये कोणत्याही संभाव्य कारवाईची योजना होती का, तसेच त्याचे कथित दहशतवादी नेटवर्क किती व्यापक आहे, याचा तपास पोलिसांकडून सुरू आहे.