आतंकवाद आणि संघटित गुन्हेगारीविरोधात पंजाब पोलिसांना मोठे यश मिळाले आहे. आंतरराज्यीय ऑपरेशनअंतर्गत पंजाब पोलिसांनी मुंबईतून दोन कुख्यात गँगस्टर-दहशतवाद्यांना अटक केली आहे. अटक करण्यात आलेल्या आरोपींची ओळख साजन मसीह आणि मनीष बेदी अशी झाली आहे. दोघांचेही परदेशात बसलेल्या दहशतवाद्यांशी आणि गँगस्टर नेटवर्कशी संबंध असल्याचे उघड झाले आहे. पंजाब पोलिसांचे महासंचालक (डीजीपी) यांनी या कारवाईची माहिती देताना सांगितले की, हे ऑपरेशन आतंकवाद आणि संघटित गुन्हेगारीविरोधात राबविण्यात येत असलेल्या मोहिमेचा महत्त्वाचा भाग आहे.
पोलिसांच्या माहितीनुसार, अटक करण्यात आलेले दोन्ही आरोपी परदेशातून चालविल्या जाणाऱ्या नेटवर्कच्या माध्यमातून पंजाबमध्ये गुन्हेगारी आणि दहशतवादी कारवाया घडवून आणण्याचा प्रयत्न करत होते. तपासात असेही समोर आले आहे की, त्यांचे दुबई आणि आर्मेनिया यांसारख्या देशांतील गुन्हेगार व दहशतवाद्यांशी संपर्क होते. डीजीपी यांनी सांगितले की, आजचा दिवस पंजाब पोलिसांसाठी मोठी कामगिरी ठरला आहे. साजन मसीहचा संबंध डेरा बाबा नानक परिसराशी असून, मनीष बेदी हा अमृतसरच्या ‘शेर-ए-राइन’ गँगचा प्रमुख असल्याचे सांगण्यात येत आहे. दोघांवरही पंजाबच्या विविध भागांतील गंभीर गुन्ह्यांमध्ये सहभाग असल्याचे आरोप आहेत.
हेही वाचा..
पंतप्रधानांचा ओमान दौरा : भारतीय म्हणाले अभिमानाचा क्षण
मणिपूर : राज्यपालांचे ड्रोन, एआय टूल्सद्वारे निगराणीचे आदेश
भाजपाने डीएमके शासनाला काय ठरवले ?
विश्व हिंदू परिषदेने ममता यांना लिहिले पत्र
पोलिसांच्या मते, डेरा बाबा नानक आणि बटाला परिसरात झालेल्या हत्यांमध्ये या दोन्ही आरोपींचा सहभाग असल्याचे समोर आले आहे. तसेच अमृतसरमध्ये मुलींवर झालेल्या हल्ल्यांमध्ये आणि दहशत निर्माण करणाऱ्या अनेक घटनांमध्येही त्यांची भूमिका असल्याचे निष्पन्न झाले आहे. या घटनांद्वारे परिसरात भीतीचे वातावरण निर्माण करून गुन्हेगारी नेटवर्क मजबूत करण्याचा प्रयत्न करण्यात येत होता. डीजीपी यांनी पुढे सांगितले की, हे आरोपी परदेशात बसलेल्या आपल्या आकाांच्या इशाऱ्यावर काम करत होते आणि पंजाबमधील कायदा-सुव्यवस्था बिघडवण्याचा कट रचत होते. पंजाब पोलिसांनी वेळीच त्यांच्या हालचालींवर नजर ठेवून ठोस माहितीनुसार मुंबईत छापा टाकत दोघांनाही अटक केली.
सध्या दोन्ही आरोपींची सखोल चौकशी सुरू आहे. चौकशीदरम्यान त्यांच्या परदेशी संपर्कांबाबत, आर्थिक पुरवठा (फंडिंग) नेटवर्क आणि इतर साथीदारांबाबत महत्त्वाची माहिती मिळेल, अशी पोलिसांना अपेक्षा आहे. पंजाब पोलिसांनी स्पष्ट केले आहे की राज्यात आतंकवाद आणि संघटित गुन्हेगारीविरोधात शून्य सहनशीलतेची (झिरो टॉलरन्स) भूमिका अवलंबली असून, भविष्यातही अशा घटकांविरोधात कठोर कारवाई सुरूच राहील.