ट्रॅफिक जॅमदरम्यान महाराष्ट्राचे मंत्री गिरीश महाजन यांना जाब विचारतानाचा व्हिडिओ व्हायरल झाल्यानंतर संबंधित महिला टीना चौधरी यांनी अखेर आपली बाजू स्पष्ट केली आहे. सोशल मीडियावर आपल्या सुरक्षिततेबाबत व्यक्त होत असलेल्या चिंतेबद्दल त्यांनी आभार मानत आपण सुरक्षित असल्याचे सांगितले.
चौधरी यांनी दिलेल्या माहितीनुसार, २१ एप्रिल रोजी त्यांनी आपल्या मुलीला संगीत वर्गासाठी सोडले होते. सायंकाळी ४.४५ वाजता तिला परत आणण्यासाठी जात असताना महिंद्रा ताज परिसरातून वळण घेतल्यानंतर त्या प्रचंड ट्रॅफिक जॅममध्ये अडकल्या. सुमारे २५ मिनिटे गाडीत थांबल्यानंतरही वाहतूक सुरळीत होत नसल्याने त्या बाहेर पडून कारण जाणून घेण्यासाठी गेल्या.
हे ही वाचा:
प्रसून जोशी यांची प्रसार भारतीच्या अध्यक्षपदी नियुक्ती
नसरापूर बालिका अत्याचार प्रकरणी नागरिकांनी अडवला मुंबई सातारा महामार्ग
‘सर्व शक्ती’ टँकर सुमारे ४५,००० टन गॅस घेऊन भारतात होणार दाखल
बेकायदा राहणाऱ्या बांगलादेशी महिला चालवत होत्या वेश्याव्यवसाय
पुढील दीड तास त्यांनी तेथे उपस्थित पोलिसांकडे वारंवार विनंती केली की, रस्त्यात अडथळा ठरत असलेल्या दोन बसेस हटवल्यास वाहनचालकांना यू-टर्न घेऊन मुख्य रस्त्यावर जाता येईल. मात्र, त्यांच्या म्हणण्यानुसार पोलिसांकडून कोणताही प्रतिसाद मिळाला नाही.
व्हायरल व्हिडिओमध्ये दिसणाऱ्या बाटली फेकण्याच्या प्रकाराबाबतही त्यांनी स्पष्टीकरण दिले. “मी कोणत्याही आंदोलक किंवा रॅलीकडे बाटली फेकलेली नाही. पोलिसांचे लक्ष वेधण्यासाठी ती जमिनीवर फेकली,” असे त्यांनी नमूद केले.
दरम्यान, त्यांनी मंत्री महाजन यांच्याबाबत सकारात्मक भूमिका घेतली. “त्या ठिकाणी उपस्थित असलेल्या लोकांमध्ये महाजन हे एकमेव व्यक्ती होते ज्यांनी माझं म्हणणं ऐकून घेण्याचा प्रयत्न केला. त्यांच्या सूचनेनंतर त्या दोन बसेस हलवण्यात आल्या आणि सर्वांना यू-टर्न घेऊन मुख्य रस्त्यावर जाता आले,” असे चौधरी यांनी सांगितले.
या घटनेनंतर सोशल मीडियावर विविध प्रतिक्रिया उमटत असून, ट्रॅफिक व्यवस्थापन आणि आपत्कालीन परिस्थितीत प्रशासनाच्या प्रतिसादावर प्रश्नचिन्ह उपस्थित केले जात आहे.